Da ki lyer shet, yn ioh ki long iing ba duk ha ki thain Nongkyndong

Nongstoiñ, 26 Iaiong:
Ka ophis jong u Deputy commissioner (Supply) West Khasi Hills District Nongstoin kala pynbna paidbah ba ka sorkar India ka la dep ban pyllait paidbah ia ka Pradhan Mantri Ujjwala Yojana (PMUY) da ka jingthmu ban wanrah ia ka jingshet jingtiew kaba khuid ba suba lyngba ka jingpyndonkam noh da ki lyer shet sha ki long iing kiba duk ha ki thain Nongkyndong.
Da kaba wanrah ia ka PMUY, ka jingshaniah ban shet jingshet da ki dieng la khmih lynti ba kan sa kham duna bad ruh ka iarap shibun ia ki longkmie kiba shet jingshet, shuh shuh ka jingapplai ia ka lyer shet LPG lyngba katei ka skhim yn pyllait ha ka kyrteng jong ki longkmie kiba wan na ki long iing kiba duk (BPL family).
Ha kaba iadei pat ban aplai thymmai ia ka lyer shet (LPG connection), ka dor kan long T. 1600 kaba kynthup ruh ia ka security deposit T.1250, regulator T.150, hose pipe T.150, administrative charges T.50, bad ka dor jong ka Stove kaba don ar jaka thang kan long T.999 kynthup ruh ia u tyndong lyer shet ba nyngkong ha ka dor Rs 591 ei ei u wei ha kaba yn hap ban siew da ki nong applai bad lah ruh ban siew suki suki manla u bnai (EMI facility).
Shuh shuh ha kaba iadei bad katei ka bynta na ka liang kong ka ophis jong u Deputy commissioner (Supply) kan sa pynlong ruh ia ka jingialang pynsngewthuh paidbah ha manla ki jaka jong ka District ha kaba yn wan ban ai jingpynshai ruh da ka Oil Marketing Companies (OMCs) ha kaba iadei bad kiba lah ban applai ia katei ka Skhim bad kumjuh kumno ban pyndonkam ia katei ka jingkhang lyer shet Jingshet bad kiwei kiwei.
Ki longkmie kiba wan na ki long iing ba duk, ki la lah ban leit applai ia katei ka Skhim thang lyer shet na ka LPG distributor kaba don ha Nongstoin kata ka M/s Ailang Gas Agency, da kaba pyndap ia ki phom bad ki nongioh jingmyntoi lyngba katei ka Skhim kin hap ruh ban ai lang ruh ia ki kot pynshisha ia ka jaka sah, ki Account jong ka bank kaba ki don bad kiwei kiwei katkum ka jingbthah ha ka phom, bad ia katei ka skhim yn ioh jingmyntoi tang kito kiba la don kyrteng ha ka thup jong ka SECC.
Kat haduh mynta hi na ka liang jong ka ophis u Deputy Commissioner (supply) kan pyllait shwa tang ia ki phom applai bad hadien bala ioh ia ka humkum shen yn sa ailad pat sa ban applai noh ia ki lyer shet bad kat haduh mynta ki nong applai ia katei ka Skhim ha baroh kawei ka Ri India, ki la don haduh kumba 2 klur tam ei ei, katba ha Nongstoiñ la ioh pdiang ia ki nong applai haduh kumba 3682 ei ei ki long iing kiba duk.