Da ki lama iong, pdiang sngewbha ka KSU ia U MR ha Riangdo

Nongstoiñ, 10 Naitung:
Kum ka dak ban pynpaw ia ka jingpyrshah jur ia ka jingthmu jong u Mukul M Sangma ban wan rah surok rel sha ka RI Khasi bad ka jingthwet bad kem pathar ia ki dkhot jong ka seng, na ka liang jong ka seng Khasi Students Union West Khasi Hills District Unit hapoh ka jingialam jong u samla John Fisher Nongsiang kum u President, mynta ka sngi ki la pdiang sngewbha ia u Myntri Rangbah jong ka Jylla da ki lama iong ha ryngkat ki jingthoh pynrem ia ka jingleh jong u.
Kitei ki dkhot jong ka seng KSU WKHDU, ha ryngkat ka KSU Mawshynrut Circle, ki la pynlong ia ka jingdeng lama iong ha Riangdo bad ki la ap khnang ruh ia u Myntri Rangbah u ba thmu ban wan plie ia u maw nongrim jong ka Mawshynrut Civil Sub Division ban pyni bad pynpaw ba ki pyrshah jur ia ka surok rel kaba la thmu ban wanrah sha ma Ri Khasi.
Haba iakren bad ki nongthoh khubor na ka liang jong u samla John Fisher Nongsiang President ka KSU WKHDU, u la ong ba ka seng KSU ka sngewkmen ia ka jingplie paidbah noh ia ka Mawshynrut Civil Sub-Division, bad kam don kano kano ka jingpyrshah halor katei ka bynta hynrei kaei kaba ka seng ka wan ban deng lama iong ka long ban pyni sha u Myntri Rangbah ba ka seng ka pyrshah jur ia ka surok rel hapoh ka Ri Khasi.
Shuh shuh u samla Nongsiang u la ong ruh ba lada ka sorkar jong u Mukul ka dang iai kuman halor ka surok rel bad lada kam pyllait noh ia ki dkhot jong ka seng kiba la shah kem na ka liang jong ka seng ka la kloi ban mih sha ka madan thma ha ki prokram jingiakhih kiba tyngeh ia kaba ka KSU Sengkmie kala pynkhreh bad kan sa pynbna noh shen.