Da ki klur tyngka siew bai jaka sha ki bym dei ki trai

Shillong, 24 Jymmang:
Ka Public Accounts Committee jong ka Meghalaya Legislative Assembly mynta ka sngi ka la thaw da ka komit ba kyrpang ban tohkit ia ka kam kaba ia dei bad ka jingsiew bai jaka kaba da ki klur tyngka sha ki briew ki bym dei hok ki trai, ia katei ka komiti yn khlieh da u Chief Secretary ka jylla. U Chairman jong ka PAC u bah Paul Lyngdoh u la ong ba ka ophis jong ka Deputy Commissioner ka ri-Bhoi district ka la siew ia ka bai jaka sha ki briew ki bym dei hok ki trai jaka hynrei kiba shu kam ialade kum ki trai jaka kaba la shim ban pynheh ia ka kad liengsuiñ ha Umroi.
U bah Paul u la ong ba u Chief Secretary u K.S Kropha u la u la kular ha ka PAC ba un ialam ia ka kynhun tohkit ban lap ia ki ophisar kiba siew bai jaka khlem da tohkit bha bad khlem da pynshisha janai la ki briew ba ki siew ki dei hok ne em ki trai jaka. U bah Paul u la ong ia ka ripod katei ka komiti u Kropha kan sa phah kham kloi. Lada jia ba ka komiti ka lap ba ki ophisar ki donkti ha ka kam be-aiñ yn sa pynngat ha ki kam pynkheiñ aiñ namarba kat katei ka pisa ka dei ka jingduh nong ba khraw ia ka jylla.