Da ki ‘kali wut wut’ buh ka MeECL ban mareh haba lip ding

Shillong, 12 ’lyngkot:
Ka karkhana sam ding ka sorkar jylla ka la pynlait paidbah da ka kali ‘10 Meghapower Vans ne ki kali wut wut’ ban beh haba don kano kano ka jingujor ia ka jingthut ka ding.
Ia kine ki 10 tylli ki kali, la pynlait paidbah da u myntri ding ka jylla u Bah Sniawbhalang Dhar ha Lum Jingshai, Shillong. Ia kine ki kali yn pyndonkam haba don kano kano ka jingjia ba kyrkieh lada ioh jingujor na ki paidbah halor ka jingthut ka ding.
Ha kane ka sngi, u Myntri u la pynlait ruh ia ka website kane ka kompeni ka sorkar ka ka www.meecl.nic.in ha kaba ki nongthang ding ki lah ban ioh ia ka jingtip shaphang ka MeECL, ka dor ka mur ka bai thang ding, ka jingpan ding ne connection bad ka jingsiew jingtda nalor kiwei ki jingdonkam. Kane ka website kan ai ruh ia ka jubab haba don kano kano ka jingkylli na ki paidbah.
Haba kren ha kane ka sngi, u myntri u la ong ba ka jingpynlait paidbah ia kine ki kali bad ka website kan pynlong ia ka MeECL ban ai ia ka jingshakri kaba kham paka sha ki paidbah ka jylla. U la ong ba ka sorkar ka la bthah ia ki Deputy Commissioner ki District ban khot ia ka jingialang ban pynshai ia ki nongkitka m shnong ban pynsngewthuh ia ki paidbah ban sangeh ka jingtuh ding. Katba u Additional Chief Secretary uba peit ia ka MeECL, u Bah P. S. Thangkhiew bad u Principal Secretary u M. S. Rao ki la kren ia ka jingtreikam kane ka kompeni ka sorkar.