Da ki jar nar, pynieng ki ri khappud bad ka Russia, ba syier ia ka thma

Ki ri bapher, kiba don ha khappud jong ka Russia, ki la pynieng da ki jar nar, na ka bynta ban kiar, na ka jing iakynad thma bad ka Russia.

Ka Poland, Lithuania bad ka Finland, ki pynieng da ka kynroh kaba da ki nar kiba skhem bha, ha khappud jong ka Russiad ba ka Belarus. Kiwei pat ki ri Europe, kiba la sdang ban ker sainar shiah, ki kynthup ia ka Latvia bad ka Estonia bad ka daw, ka long ba kitei ki Ri, kim kwah ban ailad ia ki shipau Russia, ba kin rung kin mih bad ba kin shalan tiar thma sha kitei ki Ri.

Kitei ki Ri, ki don ia u pud uba 2,106 mer bad kin pyndep, ia katei ka jingker sainar shiah ha u snem 2025. Katei ka jingker sainar, ka dei hadien ba ka la don ka jing pynher namding na Ukraine sha Poland, ha ki khyndiat sngi ba ladep; kaba la pynkhie bitar ia ki ri jong ka NATO.

Ka Poland, ka la sdang ia ka jingker sainar shiah, kaba 144 mer sha ki bynta jong ka Kaliningrad, kaba don ha khappud bad ka Russia, kaba hap ha syndah ka duriaw bah Baltic. Ka jingker ia u sainar, ka dei kaba jrong phra phut bad sa 10 phut ka pyngkiang, ha kaba ki don ki camera, kiba peit pyrman bha ia katei ka jaka.