Da ki hajar ngut, yn thung kam pulit ha ka Jylla

Shillong, 3 Jylliew:
Ka tnat pulit, ka pynbna paidbah, na ka bynta ka jingthung kam ia 100ngut, na bynta ka kam UB Sub Inspector bad nangta sa 25ngut, na bynta ka kam AB Sub Inspector, nangta sa 463ngut ki UB Constable, 41ngut ki Firemen, 10ngut ki Driver Firemen, 96ngut ki MPRO Constable bad 23ngut ki WPC.
Nangta la pynbna shuh shuh sa 150ngut ki AB Constable, 600ngut ki State Battalion Constable & IRBN Constable, 20ngut ki Handyman Constable, 3ngut ki Rider Constable nalor kiwei kiwei pat.
Kiba kwah ban tyrwa ia ka kam UB Constable, ki dei ban long kiba 18 haduh 21 snem ka rta bad ki dei kiba la pyndep ia ka jingpule 10+2, katba ka AB Constable, la khot ia kiba la pyndep Class IX.
Ka tarik ba khadduh, ban thep ia kitei ki kam, ka dei ha ka 31tarik Naitung 2016, kaba dei ka Sngi U Blei.
Na ka jingpyntip, kaba la buh ha ka website jong katei ka tnat pulit, la pyni, ba la phah sha ka tnat pathai khubor jong ka sorkar Jylla, ba kan pynbna ia katei ka kam, ha kawei ka kotkhubor Khasi, Jaintia bad Garo.
Lah ban kynmaw ba dang shen, katei hi ka tnat pulit, ka la kren diaw mynsiem, ba kiba bun ki samla Garo, kim shym la tip satia ia ki kam, kiba lait, kiba don ha katei ka tnat pulit bad katei ka la pynlong ia ki pulit, ba kin pynlong ia ka jingjied kyrpang ia ki samla, kiba don ha ki nongkyndong sha Garo Hills, ba kin ioh ban tyrwa ialade sha ka kam pulit bad ka daw, ka long namar ba kim tip satia, ba ka don kaba kum katei ka kam kaba lait.
Ki don bun ki samla kiba don sha ki nongkyndong, kiba la kren bynniaw halor ka jing khapnap jong ka tnat pulit, ha kaba ai jingpynbna iar, ia katei katei ka jingthung kam, kaba kot da ki hajar ngut eiei, ha kaba la pynbna, tang ha kawei ar tylli ki kotkhubor bad kumjuh ruh, ha kaba la shu pynbna tang shisien pynmih.
La don bun kiba ujor, ba lada jia ba ka jingpynbna ka duna palat, kumta kin bun ki ban duh ia katei ka lad ban tyrwa ialade bad ka ban ailad pynban tang ia ki briew kiba nabar bad kiba kham shalak ban ioh phrung khlieh ha katei ka kam pulit jong ka Meghalaya.