Da ki hajar ngut kiba duk, ym lah ban ai lut sha baroh shisien ai: SP

Shillong, 21 Nohprah
Kum shi bynta ban noh synniang bad ai lem ka lad ia kito ki longïing kiba duk ban ioh leh kmen Christmas kumba ioh lem kiwei pat, na ka liang ka Sadar Police Station ha ryngkat ka jingiatrei lang bad ka Batesi TV, ka la pynlong ia ka jingrakhe leh kmen Christmas da kaba sam ia ki jingiarap sha ki longïing kiba duk.mynta ka janmiet hapoh ka hall jong ka thanad Sadar bad ha kaba la ioh ban noh ia ki jingiarap da ki blanket, u cake bad kiwei ki jingia jingiarap sha ki 17 tylli ki longïing kiba duk.
Kine ki 17 tylli ki longïing ki dei kiba la jied na ka thain Mawpat, Oakland Bivar Road, na Keating Road, na Mawlai bad na Polo bad ia ka jingjied ia kine ki longïing, don kiba la aiti ha ki shnong ban jied bad don ki longïing pat kiba la jied hi da ka Batesi TV.
U Superintendent of Police (SP) ka East Khasi Hills u Bah M Kharkrang haba ai jingkren kum u kongsan ha kane ka jingialang sam jingiarap u la ong ba ka jingleh kmen ia ka Christmas kam mut satia tang ban ia leit thied jaiñ thied nep thymmai, ne ia thied cake hynrei dei ban rakhe bad lehkmen da kaba ai jingiarap kaba mar kylliang. U SP u la ong ba ha ka jingshisha ki don da ki hajar tyli ki longing kiba don hapdeng ka jingduk tasam hynrei ka long pat kaba eh ban noh jingiarap shisien noh ha kaju ka por bad u la ong ba yn nang iai pyrshang ban kynjoh la ki kti jingiarap kat shaba kot bad katba don la ka bor sha kiba duk na kiba duk tam.
U la ong, kane ka jingpyrshang jong ka Sadar PS ka long kum shi bynta ban nang pynkhlaiñ bad wanrah ia kata ka jingiajan hapdeng ki pulit bad ki paidbah ha ka jingiatrei kam kaba na ka por sha ka por. U la ai khublei ruh ia ka Batesi TV kaba la shim ia kane ka sien jam ban iadon bynta lang ha kum kine ki prokram kiba long shisha ka jingkyrkhu ia ki longïing kiba duk bad u la ong ba lyngba kane, la khmih lynti ba ha u snem ban wan, yn sa bud sa kiwei pat ki thanad ban iarap ia ki longïing kiba duk.
Nalor u kongsan, la ioh ruh ia ka jingkren na ki heh pulit ka district, na u Editor in-Chief ka Batesi TV u Bah Kyrmen Uriah, na u Rangbah Shnong ka Keating Road bad ka jingduwai kyrpang na u Bah Khrawbuit bad la pynphuh pynphieng ruh da ka jingrwai Christmas bad sa pynbud pat da ka jingiadih sha lang hadien ba la dep ban sam lut ia ki jingiarap sha baroh ki longing.