Da ki hajar, leit ontep donburom ia U Phadar Sngi

Shillong, 30 Jymmang: Da ki hajar ngut ki paidbah na kylleng ki jaka ka ri Khasi ki la leit ontep donburom ia u Phadar Sylvanus Sngi Lyngdoh mynta ka sngi ha ka nongbah Shillong.
Naduh ki samla ki rangbah bad kiba duna dkhot met ruh ki la mih ban leit synran ia ka met  jong u Phadar u Lyngdoh niam ka Balang Katholik hynne ka sngi sha lum jingtep ha Laitumkhrah.
Shwa ban leit sha lum jingtep, la pynlong ia ka jingpyndep shwa ia ka jingleh niam ka mass ha ka Cathedral Laitumkhrah. Ia ka met jong u phadar la rah ryngkat ka jingtem jingput bad ka jingiam briew khamtam ki paidbah riew ngeit ka Balang Katholik.
Ki Archbishop na Shillong, Guwahati, Dibrugarh  bad na Tura nalor kiwei, kila wan ban ai burom khadduh ia une u rangbah. Ki phadar na baroh ki jylla ka Dong Mihngi, ki dkhot ka Salestian ki la iadon ha kane ka jingleit ontep.
U Phadar Sngi u la shitom kumba 5-6  bnai shwa ba un khlad noh ha kane ka sngi u Blei ha Nazareth Hospital, Shillong.
Ïa ka met jongu la rah na Sacred Heart Shrine, Mawlai Shillong sha iingmane Cathedral ha Laitumkhrah ha ka por 1:30 Pm ha kaba ïa ka Mass Bakhuid la pyniaid da u Most Rev. Dominic Jala, SDB, DD, uba long u Archbishop ka Jyllaniambah Shillong bad hadien kane la rah ia ka met jongu sha u Lum Jingtep ka Balang Katholik ha Laitumkhrah, Shillong.
U Phadar Sngi, uba ki riewngeit Katholik ki ju khot ieid ïa u kum u Akhia napdeng ka jaidbynriew Khasi ha ka thoh ka tar Khasi u la khlad noh ha ka sngi u Blei.  U la dap 95 snem ka rta bad yn tep don burom ia u ha ka 30 tarik kata lashai ka sngi Nyngkong.
La kha ïa u Phadar Sngi ha Ri-Bhoi, ha ka 3 tarik, Kyllalyngkot, 1921 bad la pynkyntang Lyngdoh Niam ïa u ha Italy ha ka 1 tarik, Naitung, 1958.
U Phadar Sngi u la pawnam bha ha ka kam hikai ïa ka jinghikai niam,  bad uba la noh synniang shibun bah ia ka imlang sahlang ha ka ri Khasi bad Jaintia. U la long u Nonghikai ha ka Sacred Heart Theological College, Shillong bad ha Kristu Jyoti College, Bangalore naduh u snem 1961.
U la long u Librarian banyngkong eh jong ka Otto Hopfenmueller Library bad u la long uba nyngkong eh ban pynkylla sha ka Khasi ïa ka Dienshonhi na ka Ktien Greek bad Hebrew. U la thoh bun bah ki kot ha ka Kolshor bad ka Dustur Khasi.
Ka Dorbar Ki Khlieh Nongsynshar Ka Ri Hynniewtrep Ka Federation of Khasi States, Ka The Grand Councils of Chiefs of Meghalaya, ka pynpaw ka jingsngew sih kaba Khraw halor ka jingkhlad noh  of u Fr Sylvanus Sngi Lyngdoh, uba Ngi lah ban ong u la long u Moses ka jaidbynriew Khasi Jaintia.
Ka lynti jingim jong u Fr Sngi ka long ka nuksa ka jingai mynsiem ia ki paidbah ka jylla Meghalaya.