Da ki dawai kynbat ioh jingkoit, na ka jingpang Cancer

Shillong, 9 Jylliew:
U wei u rangbah u ba la tip kyrteng kum u Dr.WS Syiem u la ioh jingkoit mynta na ka jingpang Cancer ne ka jingpang bampong tang da kaba sumar hi ialade da ki kynbat. Utei u rangbah u la shah sumar ha NEIGRHIMS ha u snem 2011.
Ha ka jingiakren bad U Rupang u la iathuh ba ha ka 14 tarik u lber, 2011 u la leit sha NEIGRHIMS ban shah sumar bad la lap ba u don jingpang Cancer ha u ryndang jong u.
“Ha ka 18 tarik u ber, 2011 ki la puid ia ka ngab jong nga, ki la law lut baroh ki shyieng ngab, ki bniat tyngam,nga la sah hangtei shibnai kynthih, hynrei ngam ioh jingiarap eiei, tang shu law ia ki drip nga sngew kum ban shu dkut mynsiem noh” ong u Dr.Syiem haba ia kren bad u Rupang. U la iathuh ba hadien ba la dap shibnai u la mih noh na katei ka Hospital, wat la ki doktor kim pat pyllait ia u.
U Dr.Syiem u la ong ba mar ia mih na katei ka jaka sumar u la sdang ban sumar hi noh ialade da ki dawai kynbat, namar ba u dei ruh uwei na ki nongai dawai kynbat uba la im haduh 16 snem ha katei ka kam. Utei u rangbah mynta u la iathuh ba ki shyieng ngab jong u baroh la law lut khait hapoh NEIGRHIMS bad ki ngab jong u kim lah kyrshan shuh naba ym don shyieng shuh bad ki noh shapoh, “Ki la lut ki shyieng ngab, Dei na kane ka daw ba nga teh noh da ka jain ba kan kyrshan ia ki ngab jong nga” ong utei u rangbah uba pyni artad ia ka ngab jong u kaba la shah puid bad u law ia ka jain kaba u tap.
U Dr.Syiem,55 snem karta u la ong ba u ju ai dawai kynbat naduh ki por ba u dang long khynnah samla bad haduh mynta u dang bteng ia katei ka kam bad u don ruh ka dukan ai dawai kaba la tip kum ka Khasi Indigineous System of Medicine bad u don ka dukan ha Mawkhar hajan YMCA. U Dr.Syiem u shong u sah ha Umsohsun ka shnong trai jong u ka dei na Umyiap kaba don hapoh West Khasi Hills.
Utei u rangbah u la iathuh ba katei ka kam ai dawai kynbat ka dei ka kam jong u bad u im jakpoh ruh na katei ka kam kaba u trei haduh mynta badu la iathuh ba u don ka kper kynbat kaba rit kaba u thung ia ki jingthung kiba long dawai hynrei kiba bun hi u ong ba hap ban wad na lum. Kum uwei na ki nongai dawai Khasi uba tbit ba ki nongpang ki tuid sha ka dukan jong u man ka sngi u la pynpaw ba ka long kaba donkam haduh katta katta ban pynneh pynsah ia katei ka rukom ai dawai Khasi lane dawai kynbat kaba u la blei u la ai kyrpang ia ka sap ka phong sha ki nongsumar tang lyngba ki jingthung jingtep.