Shillong,13 Naitung:
Bunsien ha kylleng ka pyrthei, ki don ki nongpang kiba la iap tang na ka daw ba ki dih bakla ia ki dawai bad ka daw bah ka dei ba ki nongai dawai bunsien ki ju bakla ban ai dawai sha ki nong pang naba kim ithuh bha ia ki dak ba ki doctor ki thoh kyrteng dawai. Ka sorkar pdeng mynta ka pynkhreh ban mih pynmih noh da ka hukum ba baroh ki doctor ki dei ban thoh shai ia ka kyrteng dawai kaba ki ai sha ki nongpang bad ba kin thoh da ki dak heh. Ki lad khubor ki la ioh ban ia kren bad katto katne ngut ki doctor halor ka phang la ka long ne-em ka ba donkam ban thoh noh da ki dak heh khnang ban lait na k ijingbakla haba thoh kyrteng ia ki dawai, “KA LONG KABA DEI EH” jubab u Director of North Eastern Indira Gandhi Regional Institute of Health and Medical Science (NEIGRIHMS), u Dr AH Ahangar da kaba thoh da ki dak heh uba la pynpaw ba ma u ruh u sngew iahap ia katei ka jingai jingmut ka sorkar pdeng.
Nalor u Dr.Ahangar ki lad khubor ki la ioh ruh ban kylli na u Dr Aman War, president ka Meghalaya Medical Service Association halor katei ka mat ha kaba u la ong ba ka dei ban pdiang sngewbha lada don kino kino ki jingai jingmut kiba dei na bynta ka jingmyntoi ki nongpang. Sa uwei pat u Doktor u C Daniala,u professor ha ka tnad Radiology ha NEIGRIHMS u la ong “Ka dei ka jingmut kaba biang eh, kan kham bha ban shu type ruh ia ki kyrteng dawai ha ki kompiwtor, bunsien ngim ithuh ia ki dak ki para doktor jong ngi bad teng teng ngim ithuh ruh ruh ia ki dak lajong” u la ong biang.
Phi don ban ong eiei?