Da kaba shong kyllaiñ myngngor, yn sdang ka VPP, ba kuman ka Sorkar

Shillong:Na ka daw jong ka jingpulom jong ka Sorkar MDA-II hapoh ka jingïalam jong u Conrad K. Sangma kum u Myntri Rangbah ban sngap ïa ka jingkyrpad ka seng ban thung biang ïa ki nongtrei jong ka office Lokayukta, ka Voice of the People party (VPP) kan pynlong ïa ka jingshong kyllaiñ myngor ha khmat ka Meghalaya Secretariat ka ban sdang ha ka sngi Thohdieng ka 19 tarik mynta u bnai, 2024 ha ki por treikam kata naduh ka por 10.00 baje mynstep haduh ka por 4.30 baje janmied.

Kane ka jingïakhih kan bteng biang la sngi Nyngkong ka 22 tarik mynta u bnai, 2024 lada ka Sorkar kam kohnguh ïa kane ka jingkyrpad.
Ka jingpynduh ïa ka jingtrei kitei ki ophisar kam dei tang ka jingbym leh hok bad ka jingpynleh raiñ ïa ka jylla baroh kawei bad kumta kadei ka kamram jong baroh ki nongshong shnong kiba dang pyrkhat ïa kaba bha ban ïashimbynta ha kane ka jingpyrshah ban pynkohnguh ïa kane ka sorkar.

Ka Party ka kyrpad ïa baroh kiba ïashimbynta ban kiar na kano kano ka kam kaba pynkheiñ aiñ bad pynthut ïa ka shongsuk shongsaiñ bad ka jingïaid beit ka jingïakhih, ong ka kyrwoh na u Nongaiktien ka VPP u Dr. Batskhem Myrboh.