Da kaba pan map

Toki Blah
Da kaba pan map na ki Seng Sain Pyrthei (politikal partis) ka jylla Maghalaya nga kwah ban ring ia ka jingmut jingpyrkhat ki nongpule sha kiei kiei kiba ngan pynsngew harum. Lah sanphew snem mynta ngi la iai jied shi iai jied ia kita ki MLA jong ngi hynrei ym imat poi shano shano. Ha ka jaka ban kiew ka jylla; ban kiew ka roi ka par; ban kiew ka ioh ka kot imat nang ring swai arshah; nang iai hiar sha nurok ka ksew.

Ym don nongialam; sah khun swet ka Jaitbynriew ha ka umdum; kiew arsut ka shitom ka saja; ym idon ba salia jia aiu ia u paidbah. Mynta pat sa shi sien ngin ia mih ban ia leit jied MLA biang ha u 2023. Ym banse ban kylli, hato ngi nang ne em ban jied MLA kiban long ki nongshyshar khadar ia ngi bad ia ki khun ki ksiew jong ngi? Haba peit ia ki snem ba lah leit te imat hap ia pyrkhat biang bun bun sien.

Lada pdiang ia ka jingshisha ba paw tyngkrein, lehse ngim long kiba tbit ne ngim long kiba nang ban jied Nongthawain sha ka Dorbar thawain ka Jylla. Bun na ngi, lehse baroh baroh ruh ia mynjur ba ngi dei ban jied ia u briew uba bha. U briew uba beh ha ka iap ka im; uba kit ha ka khia ka shon ( kumban shu ai nuksa, u briew uba lah ban siew bai skul khun; uba lah ban siew bai hospital; u briew uba lah ban siew bai kali ban ia leit bam khana; u briew uba kloi ban pynpoi ei ia u khaw, shini bad umphniang sha iing iap briew; u briew u bym salia ban pynlut ban thied kyiad ban ia leh tamasa ki nongbud). Kaba kham kongsan, ia bud ia u briew uba lah ban sam pisa ha ka por ilekshon. Uta kein ngi khein u dei u briew uba Bha. Ngi ia kohnguh lut baroh baroh ba uta shisha te u dei u briew uba bha uba ngi hap ia kyrshan ha ka ilekshon MLA.

Hynrei lada ngin ia peit thuh khyndiat ngi lap bad sngewthuh ba ka ilekshon MLA kam dei te ka kam ban ia bud ia u briew ba bha. Wa kumno kumta phi lah ban kylli? Peit bha bad pyrkhat bha seh. Ka ilekshon MLA ka dei ka jingjied ia u Nongthawain sha ka Dorbar Thawain ( Member of the Legislative Assembly) Kam dei ka kam ban ia jied ia u briew Ba Bha sha ka Dorbar ki Briew ba Bha! ( Assembly of Good People). U briew ba bha lada heh lei sa u saipan te u long u briew uban ai jingsngewbha ne jingmyntoi shi sngi. Kaba kham sniew shuh shuh ka long ba u nang ban pyrkhat tang namar ki nong kyrshan lajong ne tang ia ka constituency lajong. Ym lah ban pyrkhat jngai. Ym lah ban iohi kiei ki jingdonkam ka jylla baroh kawei. U Nongthawain pat u dei u briew ban ieng ha Dorbar Thawain ban iasaid ia pyni nia pyni jutang kumno ban wanrah ia ki ain, ki kanun kiba pynkiew ia ka imlang sahlang uba bun ba lang; ban shna ain ban kyntiew ia ka pule ka puthi, ka rukom ai jingiarap bad sumar nongpang bad ki lad ki lynti kumno ban im suk im sain ki paidbah ka ri. U dei u briew uba shemphang ban wanrah ki skim ba pher ba pher ban kyntiew ia ka ioh ka kot; ka ioh kam ioh jam ki briew ka jylla. Ka jing thep vote MLA ka dei ka lad ban ia jied ia ki briew kiba don ka sap; ka jingshemphang bad ka bor pyrkhat kumno ban ai ka shyshar khadar ka jingshakri paidbah kaba bha ba miat sha u duk u suk, u sem shiliang kup shiliang ka jylla baroh kawei.
Kaba sngewshi ha ka ri jong ngi ka long ba ki nong thep vote ki kyrni bad lapmiet ban ia kyrshan ia ki Briew ba lah ban leh bha ym ia ki Nongthawain ba stad ba shemphang kiba lah ban wanrah ia ki ain ki kanun kiba bha. Kaba kham sngewsih ka long ba kita ki seng sain pyrthei ha jylla jong ngi (ki political parti, seng riewlum ne seng ri thor ym don jingiapher; ka juh saw ar shyieng kum ba ong u dkhar) ruh ki ia lapmiet ban ai tiket ia u briew ba bha, khamtam lei lei ia uba lah ban sam pisa. Pynbieij ia ki paidbah da ka pisa ; jabieng te khlieh sniang khlieh masi suda hynrei ban jop te lah thikna. Ki nongialam kiba pyrkhat beit kumno ban poi sha ka bor hynrei ynda lah shong shuki ban leh aiu ruh ym bna.

Ko ki paidbah ka bri u Hynniewtrep to da pyrkhat bha; to da puson bad pynleit jingmut bha shuwa ba phin ai jingkyrshan ne ban thep la ka vote ha u 2023. Rai hi maphi. Sha u Briew ba Bha uban ialam beit sha thliew ne Sha U Nongthaw Ain ba shemphang uban wanrah ia ka roi ka par ka suk ka sain. Pyrkhat ha lade; ia kren ha la iing la sem; ia kren shaphang kane ha ki iing iap briew; ia phylliew jingmut bad ki riew shemphang ha la shnong la thaw. Ha u 2023 phin vote iano?