New Delhi:U Conrad K Sangma, myntri rangbah ka Jylla, u ia kynduh myn hynnin ka sngi, ia shibun ki myntri ka sorkar India, ha kaba ula pynsngew halor ka jingthmu jong ka sorkar Jylla, na ka bynta ban ngiat tyngeh ia ka roi ka par jong ka Jylla.
U Bah Metbah Lyngdoh, myntri kam shang pyrthei, uba dang ai jingai sngewbha sha ka Sushma Swaraj myntri kam bar ri jong ka sorkar India, ha ka jingdon lang U James Sangma bad U Conrad Sangma:CMO
U Sangma, ula ia kynduh ia ka Sushma Swaraj, myntri bar ri ka sorkar India, ha kaba ula iakren halor ka jingdonkam ban plie noh ia ka surok na Shillong sha Dhaka bad kumjuh na Tura sha Dhaka, ha kaba ka Swaraj, ka la pynthikna ba kan sa pyrkhat khia ia katei ka kam.
Ka la iakren ba kan iakren ia katei ka mat, ha ka jing ia kynduh bad ki myntri rangbah jong ka thain, ka ban long ha ka 4tarik Jymmang 2018. Ka myntri ka pynsngew halor ka jingdonkam ban shim kabu, na ka jing ia sngewthuh jingmut jong ka India bad ka Bangladesh bad ka pynpaw, ba yn plie ia ki lad ki lynti ia ka dong shatei mihngi, kumba la pruid dak ha ka Act East Policy.
U myntri rangbah, ula pynsngew ba ka donkam ka lad ban plie ia ka khaii pateng, ha ka thain bad ka Bangladesh, ha kaba ka Jylla, ka don ia u pud uba 440 Kilometre bad katei ka Ri.
U myntri rangbah, ula pynsngew ia ka jingdonkam ban pyntreikam noh da ka work permit ia ki khar Bangladesh, kiba wan rung sha ka Jylla, namar ba ka don ka jingma kaba khraw ia ka jingwan rung beain bad halor kane ka myntri, ka la pynsngew ba kan hap ban da peit bniah bha ia katei ka kam.
U Conrad, ula ia kynduh ia U Nitin Gadkari, myntri ki kam shna surok, ha kaba ula pynsngew ia ka jingdonkam ban trei kyrkieh noh ia ki surok kiba la sniew tasam, kiba iasoh na Tura sha Baghmara, kiba iasoh sha Ranikor bad nangta ka surok na Nongstoin sha Maweit nalor kiwei pat.
U myntri, ula pynpaw halor ka jingdonkam ban pynwandur ia ki surok, na ka bynta ba kin kham beit bad ba ka jingiaid lynti kan kham stet bad ula mynjur, na ka bynta ban pyntrei kham stet ia ki skhim bapher jong ka tnat PWD.
U Conrad, ula iakynduh ia U Kiren Rijiju, myntri khynnah ka tnat poh iing ka sorkar India bad ula ia kynduh ruh ia U RK Singh, uba dei u myntri ba peit ia ka tnat bor ding, ha ka jingdon ryngkat U James K Sangma, myntri bor ding bad U Singh, ula pynsngew ba u kwah ban pynstet noh ia ka jingai bor ding sha baroh ki shnong ha ka Jylla.