Da ka video, sei sabut U Mukul, ba ki trok, ki dang thep dewiong

Shillong:U Dr Mukul Sangma, nongialam jong ka liang pyrshah All India Trinamool Congress (AITC, mynta ka sngi u la ong ba u don ia ki sabut sakhi ba biang halor ka jingtih bad khaii dewiong beain ha ka jylla bad un peit ia ka sienjam na ka liang jong ka sorkar kan shim ban tehlakam ia kane ka kam beain.

Mynta ka sngi, na ka liang u nongialam jong ka liang pyrshah u Dr Sangma, u la pyni sha ki lad pathai khubor ia ki ar tylli ki video kiba don ha mobile phone jong u halor ka jingtih bad ka jingkhaii beain ia u dewiong.
Haba ia kren bad ki lad pathai khubor u Dr Mukul sangma u la ong ba wat la ka sorkar ka ju iai kyntait halor ka jingtih bad khaii dewiong beain, hynrei kane kam beain ha ka jylla ka dang iaid shait shait.
“Hato ka don ka jingshimkhia na ka liang ka sorkar ban the lakam ia kane ka kam beain ban leh hok ia ka jingkitkhlieh na ka bynta ka jylla hynrei kum ba ka long mynta kane kam don eiei namar ba ka jingiadonkti lang jong ki briew ba don ha ka bor”u la ong.

U Dr Mukul u la pyni ia kane ka video ba tih bad khaii dewiong ha kaba u la ong “Lada ka long kaba suk na ka bynta u nongialam ka liang pyrshah ban ioh ia kine ki sakhi sabut, kumno ka sorkar ka ba biang ki tiar ki tar kam tip eiei ha ka ba ym tang ka liang pyrshah hynrei bun na ki briew ki ki la pynpaw ia kane, hynrei kane ka dang iaid bteng haduh mynta hi” .
Haba kylli u la iathuh “Kane ka video ka dei ka ba dang shuh jia shen bad kawei ka video ka dei kaba ha u bnai Kyllalyngkot mynta u snem ha kaba ka don ka jingthep ia u dewiong ha ki truck” .

U Sangma u la ong ba mynta la ioh ia ki sabut sakhi kiba biang halor kane ka kam beain kiba don ha ka jylla ha kaba yn sa peit ba na ka liang jong ka sorkar kan leh kumno ban tehlakam ia kane ka bynta.
U Dr Mukul u la ong ruh “Lada kim lah ban tehlakam ia kane ka kam beain ia u dewiong bad na kane ka kam beain don bun ki kam beain ha ka jylla ki ban dang suhthied kynthup ia ka ka jingbei ia ka pisa na ka bynta ki briew kiba thmu ban seng ia ki senglehnoh ki ba dang thymmai ha kaba ki lah ban thied ia ki tiar ban leh ia ki kam pyntriem na kane ka pisa ka ba ioh suk”.
“Na kane ka jingbam sap kan wan rah ia ka jingma ia ka jylla ha kaba u la kyntu ia ki nongshong shnong ba ki dei ban pynpaw sha ka sorkar ba ka dei ban shim khia ban the lakam ia kane ka kam beain ha ka jylla”la ong u Sangma.