Da ka tyngka na Japan yn tei ia ka jingkieng Dawki

Shillong, 15 Nohprah:
Ka jylla kan sa ioh jingiarap na ri Japan ban pynbha ia ka surok National High Way ha ka jylla,ong u myntri rang bah ka jylla u Dr.Mukul Sangma mynta ka sngi. U Dr.Mukul u la ong ba ka Japan International Cooperation Agency (JICA) kan iarap pisa ban pynbha ia ka National Highways 62, 51 bad 44 ha ka jylla.U la ong ruh ba ia ka surok na Shillong sha Dawki bad ka jingkieng Dawki yn sa pynbha na katei ka pisa.
Haba batai ba ia katei ka pisa la pynioh dei lyngba ka jingtrei shitom ka sorkar jylla u la ong ba ia ka jingshna ia ka surok National Highway-127B kaba pyniasoh na Srirampur sha Phulbari, West Garo hills lyngba ka Dhubri ,Assam bad ka jingshna ia ka jingkieng Brahmaputra yn wanrah lyngba katei ka project.
U la ong ruh ia kitei ki surok ha ka jylla la mynjur da ka sorkar jylla bad kan pyniasoh ia ka Nidanpur kaba don ha khappud ka Meghalaya-Assam bad ka Phulbari-Tura bad Nongstoin. Ha ri Lum Garo u la ong ba ka National Highway-127B kan pyniasoh ia ka Rajabala, Selsella, Samanda bad Williamnagar, nalor kiwei pat. “La pynbna ia kitei ki surok ha u 2010 bad ka JICA kan bei tyngka khamtam ia ki jingkieng” u la ong haba pyntip ba ia ki kompeni ki ban pyntrei ruh la de ia kren ba kin pynkhreh noh ia ka Detailed Project Reports (DPRs) jong katei ka project.