Da ka thong T.50 hajar yn pynlong ia kob shad ka 3LU

Shillong, 11 Nophprah:
Ban kyntiew ia ki samla kiba don ha ka sap shad, ka 3 Lower Limb Unit ka la pynbna ba kan pynlong ia ka jingiakop shad ba la tip kum ka All Meghalaya Dancing Champion ia kaba yn sdang ha ka 21 tarik mynta u bnai lyngba ka Audition ka ban long ha Arts and Culture Hall, jong ka State Central Library, Shillong. U Samla Roger Osmond War, President ka 3LU haba kren sha ki lad pathai khubor mynta ka sngi u la iathuh ba ki nongjop ha kane ka jingiakop kin ioh ia ka song pisa kaba T.50 hajar tyngka kynthup ia ka Trophy katba kiba iohrah ia ka nam kaba ar kin ioh ia ka khusnam da ka pisa T.25 hajar tyngka bad ka trophy.
Utei u nongialam ka 3LU u ia thuh ba kane ka jingiakop ka long salonsar ia baroh bad la khot sngewbha ia ki riewdonsap ban iashim bynta ha ka jingshad Solo, Group bad Duet. U ong ruh ba ka jingkhiein points ia ki nongjop kan long 60 % na ki Nongbishar bad 40% na ki Votes ba la die sha ki paidbah nongkyrshan jong ki nongiakop. U iathuh ruh ba haduh mynta ki la don 6 tylli ki kynhun kiba la mih shakhmat ban wan iashim bynta ha kane ka jingiakop. Ha kaba iadei bad kiwei kiwei ki kylla iakop, u samla Roger u la iathuh ba ia ka Mega Audition yn pynlong ha ka 30 tarik mynta u bnai, katba ia ka Semifinal yn pynlong ha ka 9 tarik, Kyllalyngkot, 2016 bad ia ka Grand Finale yn pynlong ha ka 30 tarik Kyllalyngkot, 2016.