U Deputy Commissioner ka East Khasi hills district u Sanjay Goyal u la pynbna ia ka jingpyn treikam ia ka Systematic Voters’ Education and Electoral Participation (SVEEP – II) kaba ar kum ka jingpyrshang ban khot pynrung kyrteng nong thep vote ia baroh ki samla kiban dap 18 snem ha u Kyllanglyngkot 2014 shwa ka elekshon Lok Sabha election.
Haba pynbna ia kane hynne ka sngi Balang, u Goyal u la ong ba ka jingmut jong ka sorkar ban pyntreikam ia kane ka SVEEP kaba ar, kan long ban pynbna paidbah ba ki samla kiban dap 18 snem ha u Kyllalyngkot ki lah ban wan pynrung kyrteng kum ki nongthep vote.
“Kito ki samla kiban dap 18 snem ha u Kyllalyngkot 2014 kin lah ban wan pynrung kyrteng kum ki nongthep vote”, la ong u Goyal.
U la iathuh ba ka bor synshar district ka la jied kumba 20 ngut ki nonglam khubor na ki jaka pule bapher bapher jong ka nongbah ban pynlong ia ka jingialap paidbah na ka bynta kane ka jingthmu.
Shwa ia kane, u Additional district magistrate u Bah Donny M Wahlang u la iathuh ba ka jingdon jong ki samla ba pynrung kyrteng thep vote na ki jaka sor kum na Pynthorumkhrah, Mawlai, Shillong North, East, West ka duna bha mynshem snem.
U la ong ba lyngba kane ka SVEEP la khmih lynti ba ki samla ban sa dap 18 snem kin sa wan ban pynrung kyrteng ialade kum ki nongthep vote.
Ka jingmut jong ka SVEEP- II ka long, “na ka jingiashim bynta kaba kham khraw sha ka jingiashim bynta kaba biang pura”, u la ong.
U Extra assistant commissioner u N Hajong u la ong ba kane ka SVEEP-II kan pynkiew ia ka jingdon jong ki samla ban pyntung kyrteng kiba hapdeng 18 – 19 snem na kaba mynta 35 percent sha ka 40 percent.
Kane ka prokram SVEEP-II kan thmu ruh ban pynkiew ia ka jingwan pynrung kyrteng ki Non Resident Indian (NRI) na kaba mynta kaba long 0.1 percent sha ka 10 percent.
Ki Booth Level Officer (BLO) ki dei ban pynbna sha ki paidbah ha ki jaka ba ki peit khnang ba ki paidbah kin lah ban leit wad jingtip haba don kano kano ka jingeh ne ki sngew donkam, la ong u Hajong.
Kumjuh ruh ryngkat ka jingiatreilang bad ki bor synshar ka district bad ka DERT yn pynlong ia ka jingiaid surok ban pyrta bad thoh da ki jait ktien bapher bapher shaphang ka hok thep vote ha kane ka nongbah.
Phi don ban ong eiei?