Shillong, 16 Nailar:
U Myntri Rangbah ka jylla u Mukul Sangma u la pynbna ba ka sorkar kan pyntreikam ia ka skhim shna iing ia kiba duk bad kiba duna ka jingioh na ka bynta ki nongshong shnong jong ka jylla. Ia kane ka jait skhim kaba la jerk um ka Meghalaya Affordable Housing Scheme (MAHS) la pynbna paid bah da u Mukul haba kren ha ka lyngkhuh sngi laitluid jong ka ri India ba 67 ha madan Polo ha kane ka sngi Palei.
Katkum ka jingkren jong u Myntri Rangbah kane ka skhim thymmai kan mih thymmai ha ka jaka jong ka Rural Housing Scheme. Kiba duk kiba duna ka jingioh kamai kin ioh jingmyntoi na kane ka skhim.
Ha kane ka sngi, u Mukul u la ong ruh ba ka jylla Meghalaya watla ka dei kaba rit ha ka jingheh hynrei ka don ki riew khhraw bad ki khla wait kum u U Tirot Sing, U Kiang Nangbah, Pa Togan Sangma bad bun kiwei kiba la noh synniang ban pynlong ia ka ri India kaba laitluid.
Ha ka jingkren, u Mukul u la ktah ruh shaphang ka jingwan tuid beain ki briew sha kane ka jylla, bad ka dei kawei ka mat kaba la sahteng la slem bha, kynthup ruh ka jingiakajia pud hapdeng ka jylla bad ka Assam bad ruh bad ka Bangladesh.
Ha kajuh ka por, u la pynbna ba ka Planning Commission ka la mang T. 4,151 klur ia ka jylla na ka bynta u snem 2013 bad ka sorkar ka la thmu ruh ban pynmih bun ki skhim ban myntoi sha ki paidbah bad ka roi ka par jong ka jylla.
Ia ka jingrakhe sngi laitluit la pynlong ruh ha ki jaka bapher bapher jong ka jylla, kynthup ha ki district, ki block, ki sub-division, ki ophis sorkar bad ha kiwei kiwei ki jaka.
Ha kane ka sngi, ka iing jong u Lat ka jylla ruh la plie na ka bynta ki paidbah ban rung kai ban ioh mad bad iohi ia ka.
Phi don ban ong eiei?