Da ka SIT, thaw ki pulit, halor ka jing pyniap ha Golflink

Shillong:U myntri ka tnad kampohing u bah Lahkmen Rymbui, u la ong ba u briew u ba leh ia ka kam sniew, wat la u dei na kano kano ka jaitbynriew ruh u dei hi u nonglehkam sniew bad ka dei ka ain ka ban pynsaja ia kiba donkti; hynrei na ka bynta ki pulit kin hap ban tohkit bha bad kam dei ka basuk ba kan shu kem katba don khlem da biang ki sabut sakhi ba paka.
Haba ia kren bad ki lad pathai khubor, u Bah Lahkmen u la ong ba ha kano kano ka jingjia kin don beit ki briew kiba pynmih ia la ka jong ki agenda, hynrei na ka bynta ka tnad pulit ki nongleh kam sniew ki dei hi ki nongleh kamsniew bad ka ain kam ju pyllait ia ki.

U bah Lahkmen u la ong ruh ba u pynrem jur, halor ka jingshah thombor jong ki 2 ngut ki samla khasi ha Golflink bad ban tohkit ia kane, ki pulit ki la thung ia ka Special Investigation Team. Ula iathuh ruh ba ia ka SIT la buh por ban pyndep ia ka jingtohkit ha kine ki 3 bnai, hynrei u la kyntu ia ki briew kiba iohi ia kane ka jingjia ba kin wan sha khmat ban iarap ia ki pulit khnang ba ki pulit kin ioh ban kem ia kine ki nongpyniap briew. Ula ong ba ka sorkar ka shimkhia halor kane ka jingjia bad dei na kane ka daw ba ki pulit ki la thaw ia ka SIT.