Da ka said laitim ki shi kurim, ba tynrah ka trok ia ka iing

Nongpoh, 20 Lber:
Arngut ki shi kurim ki la lait im da ka said, hadien ba kawei ka trok thylli kaba don ia u number MN 01 – 9658, ka la leit tynrah ia ka iing jong kitei ki shi kurim kaba don ha Mawtnum, harud jong ka surok bah NH-6, Ri Bhoi District.
Katkum ka khubor ia kaba la ioh ban lum da ki nongthohkhubor, la ong ba katei ka jingjia ka la jia hynnin ka miet ha ka por 12 baje ei ei mynmiet, ha kaba katba kitei ki shi kurim ia kaba la tip kyrteng kum ka Ebrin Wajri bad u Bhupen Basumatri, kiba dang iohthiah lyngai ha katei ka iing kaba ki shu shongwai.
La ioh jingtip ruh ba donbok, ha katei ka jingjia ym shem la don kiba la mynsaw, hynrei ka la don tang ka jingjulor jong ki tiar ki tar ba kynthup kum ia ka TV, Dish TV, u Khaw, ki jain, ki shuki lem bad kiwei kiwei.
Hynrei ka tyllong khubor na ki pulit, la ong ba ia u nongniah jong katei ka trok kaba la leit tynrah iing briew ym pat la ioh kem, namar tang hadien katei ka jingjia, u la phet noh ialade katba ia katei ka trok u la iehnoh ha katei ka jaka, kumta haba iadei bad kane na ka liang ki pulit kin dang pynlong ia ka jingtohkit khnang ban lap ia ka jingshisha.