Shillong:U Myntri Rangbahduh ka ri India u Narendra Modi, un ïashim bynta ha ka Road Show ha ka 24 tarik mynta kum shi bynta ban ïalap ilekshon ïa ki kyrtong ka Bharatiya Janata Party (BJP)-Meghalaya ki ban ïakhun ha kane ka ilekshon ka ban long ha ka 24 tarik mynta u bnai.
Haba kren sha ki lad pathai khubor, u President ka Meghalaya BJP Bah Ernest Mawrie u la ïathuh ba u Modi un wan da ka Helicopter lyngba ka Kad Helicopter Upper Shillong ha ka por 11 baje bad da ka kali un wan sha Jhalupara bad nangto un wan sha State Central Library.
U Bah Ernest ula ïathuh ba u Modi un wan buh syntiew ruh ha u Mot U Tirot Sing u ba don ha phyllaw State Central Library bad hadien kane un shim bynta ha ka Road Show shaduh Khyndai Lad ban ai jingkren sha ki paidbah.
“Ka Road Show kan sdang ha ka por 11:30 mynstep naduh State Central Library shaduh Khyndai Lad bad hangne un ai ka jingkren bad hadien ka jingkren un sa leit phai pat lyngba ka Helicopter kaba ap lypa ha Upper Shillong,” la ong u Bah Ernest.
U Bah Ernest ula ïathuh ba ka daw ban pynlong ïa ka prokram ha ka por mynstep kadei namar u Myntri Rangbah duh u Narendra Modi um kwah ba ka jingïalang kan ktah ïa ka leit ka wan jong u paidbah khamtam ki khynnah skul.
Ula ong ba ïa ka jingïalang u Myntri Rangbah duh la pynlong ha Khyndai Lad namar kadei ka jaka bapdeng jong ka Nongbah Shillong ha ka ba ki paidbah na ki konstitwensi bapher bapher kum na East Shillong, West Shillong, North Shillong, South Shillong bad na Nongthymmai ki lah ban wan sngap ïa ka jingkren u Modi.
“Kane kadei ka sien kaba nyngkong hapoh ka jylla Meghalaya ba u Myntri Rangbah duh ka Ri u Narendra Modi, un wan shim bynta ha ka Road Show bad nga kyntu ïa ki paidbah khamtam kiba don ha Nongbah Shillong ba kin wan ban ïashim bynta ban sngap ïa ka jingkren jong u Myntri Rangbah duh ka Ri u Narendra Modi,” la ong u Bah Ernest.
ngim donkam iakine ki briew ki bym tip ia ka rukum im ne ka dustur u jait bynriew hynniewtrep , balei mo ki khasi kym nang mo ban synshar ia laka jong? kine ki national party ki khroh vote non-tribal kaba mut kym don hok ruh ban khroh vote ne u khasi khara kane ka pyni shi sha kata ka Divide and Rule jong ka sokar India