Da ka prokram shad bad rwai rakhe ka FKJGP Myrdon Circle

Nongpoh: Ki nongialam ka FKJGP, Myrdon Circle, ki la pynlong ia ka jing kynmaw kaba kyrpang halor ka jingdap ba shisnem pura ka seng, naduh ba la thaw ia ka Circle kaba thymmai hapoh jong katei ka thain. Kumta ha kaba rakhe ia katei ka jingdap ba shisnem ka FKJGP Myrdon Circle, na ka liang ki nongialam jong katei ka Circle, ki la pynlong syndon da ka jingiakop Shad bad Rwai hapdeng ki khun samla jong katei ka thain.

Ha katei ka jing rakhe kaba arsngi, ka la sdang mynta ka sngi bad kiba la donlang ha katei ka sngi ki kynthup ia u Bah Lumlang Mawnai, Vice-Preident ka FKJGP ha Ri Bhoi, u Samla Nangkiew Suhktung, President ka FKJGP Myrdon Circle, ki riew rangbah, ki longkmie longkpa lem bad ki khun samla.

Haba iadei bad katei ka jingrakhe dap shisnem bad ruh ba ki la pynlong ia katei ka jingiakop Shad bad Rwai, ki nongialam ka FKJGP Myrdon Circle, ki la ong ba ka nongrim kaba la pynlong ia ki ban kin pynlong ia katei ka prokram, ka long ban kynmaw burom ia ka jingdap ba shisnem, kata naduh ba la pynskhem ia katei ka Circle ha katei ka thain bad ha kajuh ruh ka por ki la ong ba ka jingpynlong ia katei ka jingiakop shad, ka long kum shibynta ban kyntiew ia ka sap ka phong jong ki khun samla.