Jowai:Ka long ka man ka jingkhaii tuh ia u dewiong na East Jaintia HIlls sha Beltola Assam ha kine ki sngi la pynlong da ka kynhun kaba ki paidbah ki tip kum ka ‘High Level’.
Ka tyllong khubor ka la iathuh ba ha kane ka High Level ki don tang kito ki briew kiba lah ban pyniadei lane ia jan bad ki myntri sorkar. Katba ki nongkhaii ba kham rit bad ki bym don satia ka jingiajan lane iadei bad ki heh sorkar khamtam eh bad ki katto katne ki myntri sorkar, kiba kam ia lade kum kita ki ‘Low Level’ kim lah satia ban shallan ia u dewiong na East Jaintia sha Assam.
Ka khubor ka la iathuh shuh shuh ba la jan man ka por, kita ki kynhun ‘Low Level ruh ki kit la ka kit ia u dewiong ban shallan, hynrei bunsien kine ki shah bat noh ha ki pulit, tad haduh ba ki High Level kin ai bor da ka siew ruh ia ka dor kaba heh.
Ki nongkhaii dewiong kiba ha ka Low Level ki la iathuh ba ka jinglut baroh haba khein ia ka bai lynti naduh na East Jaintia Hills shaduh sha Beltola kam duna ia ka 90 hajar lane shi lakh tyngka kawei kawei ka trok.
“Ka jinglut bai lynti lada ym dei ba hap ban pyllut bun sha kita ki heh ki hain, kan long tang kumba 32 bad 35 hajar tyngka kaba kynthup ia ka 15 hajar ka bai umphniang, 10 hajar ka bai thep bad bai pynhap bad 7 hajar tyngka ka bai bam u driver bad nongniah”, la iathuh uwei na ki nongkhaii dewiong na ka group low level.
Shuh shuh la iathuh ba la pyllait ia ki ban iaid tang ha ka por miet bad mynsngi pat kine ki trok dewiong ki la hap ban ieng sha ruh surok bah bad ka sa jia ruh ka sahkut kali kaba man ka por khamtam ha ka por miet.
Hynnin ka miet la pyllait tang ia kito kiba don ha ka High Level Group katba ki Low Level Group ki dang sahkut haduh ba la thoh ia kane ka khubor bad ruh ka jingdheng kali ka dang iai bteng namar wat lada buhrieh ia ki trok sha ki jaka ba kham rieh hynrei ki bun palat kiba ieng harud surok bah bad ym shym la pyllait haduh mynta.
Phi don ban ong eiei?