Shillong: U Chairman jong ka Meghalaya Legislative Assembly Committee on Environment u bah Syntar Klas Sunn u la wanrah ia ka kaiphot hapoh ka iing dorbar ha kaba ia dei bad ka jingleit jurip ka committee ka thain Wahkaji ha kaba ia dei bad ka jinglait ka erbih (radiation) na u Uranium.
Katkum ka kaiphot kaba la wanrah mynta ka sngi hapoh iing dorbar synrai, ka Committee ka la ai jingmut ia ka sorkar jylla ba kan buhnoh da ka ktem pulit ha Wahkaji.
Ka Committee ka ai jingmut ruh sha ka sorkar lyngba kane ka kaiphot ba ka sorkar ka dei ban thung noh ia ka kynhun laitluid ne ka kynhun ba tbit ba kan jurip ia ka jingdon ka erbih (radiation) ha katei ka jaka ba don Uranium.
Ka AMD ka la sangeh ia ki kam jong ka ha katei ka thian ha dien ba ka sorkar ka la dep ban weng ia ka jingai jingbit ban tih uranium sha ka UCIL bad na ka liang jong ka MSPCB kam pat ai ia ka jingbit ban sdang ia ka kam, haba ia dei bad kane don kam ban peit bniah ha kaba ia dei bad ka jingkiew ka erbih ha ki shnong kiba don sawdong ka Domiasiat ia kaba lah ban leh da ka MSPCB bad ka CPCB.
Haba ia dei bad ka koit ka khiah ka Commitee ka la jingmut ia ka tnad ka koit ka khiah ba kan jurip ha katei ka thain bad na ka liang jong ka tnad ka koit ka khiah ka dei ban ai ia ka kaiphot sha ka committee jong ka Assembly.
Ha ka jingleit jong ka Committee sha katei ka thain ki la ia kynduh ia u Syiem jong ka Hima Langrim, ki trai jaka bad ki nongshong shnong kiba don sawdong jong katei ka thain bad ia ka jingialang la pynlong ha Wahkaji ia kaba la pyniaid da ka Deputy Commissioner.
Ki dkhot jong ka Committee ki ba la leit ban jurip ki kynthup ia u bah Himalaya Shangpliang, bah George B Lyngdoh, bah Kimfa S Marbaniang, U Rakkam A Sangma, u bah Pious Marwein bad u bah Garland Star Swett u dkhot ba la pynlong, nalor kine kila don ruh ki briew sorkar na ka tnad khlaw, ka tnad ba dei peit ia ki kam marpoh khyndew, ka MSPCB, ka CPCB, na ka tnad khlaw jong ka sorkar pdeng bad na ka ophis jong ka AMD kaba don ha Shillong.
Phi don ban ong eiei?