Da ka ktem pulit ha Langpih, dawa ka HSPDP

Shillong: U president jong ka Hill State People’s Democratic Party (HSPDP) u bah K.P Pangniang, ha ka sngi saitjain u la wan ban dawa na u myntri rangbah ka jylla u Conrad K Sangma ban tei noh da ka Police outpost ba pura ha Langpih.

Haba kren bad ki lad pathai khubor u bah Pangniang u la iathuh baka HSPDP ka la dawa, na u myntri rangbah ka jylla ban wanrah noh daka Police Outpost ba pura ha Langpih kum shi bynta ban ai jingshngain iaki paidbah nong shong shnong hapoh ka thain Langpih baroh kawei.

U la ong ba haduh mynta kane ka Pulit Thanat ha Langpih kadei tang ka khyrdop lane kata ka Anti Dacoity Camp (ADB) bad naka liang ka HSPDP ka dawa naka sorkar jylla ban pynkylla noh daka Pulit Thanat ba pura namar wat ka jylla Assam ruh ka don ka Pulit Thanat ba pura hapoh kane ka thain” la ong u bah Pangniang.

U bah Pangniang u la iathuh ruh ba ka seng, ka la dawa ban buh noh daka BOP hapoh ka thain Kyrshai namar kane ka BOP ka peit ia ka jing long jing man jong ki khyrdop kiba kynthup iaka bad ha Aithibari bad ha Balangkuna.

Nalor kane u bah Pangniang u la iathuh ba u myntri rangbah ka jylla u Conrad K Sangma u la kular ha ki ba un sa iakren noh bad u myntri rangbah ka jylla Assam u Himanta Biswas Sarma, na ka bynta ban pynbeit noh ia u pud u sam hapdeng ka jylla Meghalaya bad Assam.