Da ka kñia ka khriam, ban iada na ki nongshun, ia ka jaitbynriew

Shillong:Ka seng jong ki Nongshat Nongkheiñ kaba la tip kum ka Sengbah ki nong shat nongkheiñ ka bri u hynñiewtrep, ka la pynlong ia ka lehniam leh rukom ba shisien shisnem jong ki, ha ka 3 tarik u bnai iaiong ha Bañiun Mylliem ban duwai kyrpad ia u trai nongbuh nong thaw ban ai ia ka bha ka miat ha ka imlang ka sahlang.

Haba iathuh ia kane, U President jong ki Nongshat Nong kheiñ ka bri u hyn ñiewtrep hynñiewskum, u Rangbah Pranshon Jala u la iathuh ba na ka liang jong ka kynhun ki Nongshat Nongkheiñ ka bri u Hynñiewtrep Hynñiewskum, kane ka dei ka jing leh niam ba shisien shisnem ba manla ka snem, ha ka 3 tarik u bnai iaiong, ba kan dei ka riti ne ka hok na ki blei, dei ban don ka hok ban kynmaw kyrpang ban leh na bynta ka ri ka jaitbynriew.

U Rangbah Pranshon Jala, u la ong ruh naduh ba la seng ia kane ka seng jong ki nongshat nongkheiñ, ka bri u hynñiewtrep, ki la dep ban buh ia ka rai lang ka mynjur lang namar ba ki long dien hi ki la sah ha ka phalang ka phalit, ha kaba ki kñi ki kpa ruh kim da biang hok shuh ban pynbiang na bynta jong ki para ban kit ia ka kyrdan kum ki kñi ki kpa bad dei halor kane ka nongrim ba ka sengbah jong ki nongshat nongkheiñ ka bri u hynñiewtrep, ka la mih ban puson ban janai, ban peh ban tai, ban hikai ia ka ri ka jaitbynriew ban pyntip ruh ia ka niam tynrai ba kumno ngi la wan longbriew sha kane ka sla pyrthei bad ban im ruh ha ka lynti ba iaid beit iaid ryntih, ban im halor ka hok ka sot, kaba khlem ka diaw ka dik bad ka jynjar ka lanot.

Haba iathuh shuh, u la ong ba ka 3 tarik u bnai iaiong manla ka snem, ka dei ka sngi hiar bad nguh blei ia ki blei nongbuh nongthaw, kiba la pynbiang pyndap naduh mynnyngkong, haduh ka shijunom shipateng ha ka long briew man briew, jong ka kular ka jutang ha ki hynñiew mei hynñiew pa, ka iawbei u thawlang lem bad ki khun bynriew, ha kaba mynta ngi la roi hai la hai ha ki ktien ka mariang, ha ryngkat ka nguh ka dem ia ki blei kiba la pynbit pynbiang bad nguh ia ngi ban khroh ban btin ia ki jingdonkam ba la aiti ki blei ki la kular ban pynbiang bad kumta ngi biang na tbian ruh kumjuh na jrong ruh kumjuh da ka jingsuk jong ki blei ha ryngkat ka hok ka sot, la iathuh u bah Pranshon.

Kane ka jingpynlong ia ka nguh ka dem ba shisien shisnem ia ka ri bad jaitbynriew, jong ki paradoh para snam, kiba don ka jingthrang ban snoh ia ka rai kaba nyngkong, jong ka ïing ka sem ki kur ki jait jong ki shnong ki thaw bad ki it ki hima.
Ha kane ka sngi la kyntu ruh ia ka lama jong ka seng ki nong shat nongkheiñ ka bri u hynñiewtrep hynñiewskum, ha ryngkat kawei ka syiar kynthei ia ka hok jong ki blei bad la shim ruh da u wei u syiar shynrang ban nguh ban dem ia ki basa ki ryngkew, kiba la kdup la thum bad pynbit pynbiang.

U la ong ruh ba u basa u long kum u kñi u ba pynbit pynbiang ia ka ri ka jaitbynriew bad u ryngkew pat u dei u shipai jong ki blei, jong ka jaidbynriew ba ngin nguh ngin dem ban da ban ker, un kdup un thum haba leit haba wan ha ka ri jaidbynriew ba ngi iaid sawdong miet shai ha ka jingdon kam jong iwei pa iwei ba un ri sumar bad kdup bad btin lang. U ryngkew u don ruh ka bor ban khet ban daiñ ia u ksuid u khrei bad ka pop ka sang ban da ban ker ia u nongtuh u nongthiem bad ia u lehbor ia ki khunlung khynnah.
Ka jingbuh ia ka 3 tarik iaiong kum ka sngi nguh bad dem jong ki nong shat nongkheiñ ka dei ka jingpan hadien ba ia ki sngi ki ïa, ym shem la lap satia, hynrei ki ap ba kin mynjur ki blei bad kin kynmaw ia ka sngi 3 tarik Iaiong, manla ka snem.