Shillong, 18 Jylliew:
Ka skul St.John Bosco Girls ka ba la seng ha u snem 1937 mynta ka lah ban poi sa ha kawei pat ka synjam jong ka kyrdan jingpule ban plie sa ia ka klas XI Arts stream.
Ia kane ka klas XI Arts stream la plie da u MLA ka Sohra u Bah Titosstar Well Chyne ba la sakhi lang ki nong pyniaid skul, ka Principal Leena Laloo, ki khynnah bad kiwei.
Haba kren ha kane ka sngi, u Bah Titos u la ong ba ka jinglah ban pynurlong ia kane ka jingthmu kam dei tang ka jingangnud jong ki nongpyniaid ka skul hynrei ma u ruh kum u MLA u la don kum kane ka jingangnud. “Ngi kwah ba ka Sohra kan dei ka jaka pule ba pawnam ha ka thain”, la ong u MLA ka Sohra.
Ka jingplie ia ka Arts Stream ka dei tang ka jingsdang bad dei ban pynbud sa kiwei ki lain pule kum ka Science bad Commerce nalor kiwei de ki lain jingpule, la ong u Bah Titos.
U la ong ba ka jingplie ia kane ka kyrdan pule ym tang ba kan iarap ia ki khynnah skul ban lait ka kiew sha Shillong ne sha kiwei ki jaka ban leit wad jingstad hynrei kan iarap shuh shuh ia ki kmie ki kpa kiba shem jingeh ban kyrshan ia ki khun ban phah pule shabar shnong.
“Kum u nongmihkhmat paidbah ka dei ka kamram jong nga ruh ban shim ia ka jingkitkhlieh ban iadon bynta lang bad ki bor pyniaid skul ban pyntyllun shakhmat ia kane jingthmu”, la ong u Bah Titos.
Lah ban kdew ba ia kane ka skul St John Girls la sdang da ka Sr. Euphrasie Barbier ha u snem 1937 bad hadien bun phew snem ka jingiaid lynti, ka la kiew na ka por sha ka por haduh ba kan kot sha kane ka thong.
Phi don ban ong eiei?