Da ka khyndew siang ka PWD na Lyngkyrdem-Mawlyndun

Shillong, 18 Naiwieng:
Ka KSU South Central East Pynursla ka la pynpaw ia ka jingbym sngew iahap iaka jingleh ka tnad PWD (national Highway) kaba shu pyndap khyndew ia ka surok bah na Lyngkyrdem haduh Lad Mawlyndun kaba la sniew bha.
U President ka KSU South Central East Bah Innocent Khongstia u la ong ba mynta ka sngi ka la iakynduh hynne ka sngi ia u Executive Engineer ka NH, uba la pyntip ba ka PWD ka la pyndap khyndew ia kane ka surok namar ba kan wan iaid ka syiem Thailand ha ka 24 tarik mynta u bnai ba kan leit peitkai ia ka thain Mawlynnong.
“Ngi la dawa ba dei ban siang da ka rong namar ba ka jingsiang khyndew kan pynma pynban ia ki paidbah na ka jingpum pum”, la ong u Bah Khongstia.
U la ong ba kane ka jingleh jong ka sorkar kam iahap satia namar ba tang ban wan kai ka briew shi sngi nabar ri, kan pynbha ia ka surok katba kam pyrkhat ia ki paidbah ka thain kiba leit ba wan man ka minit ban mad ia kane ka jingsniew ka surok. “Ka sorkar ka dei ban pyrkhat ia ki briew lajong shwa ym ia kiba nabar namar ba ka jingjynjar jong ki paidbah ka thain ka la jubor na ka jingsniew ka surok”, u la ong.