Ha kiba kum kine ki por, ba ka jingshit ka thang jubor ha kylleng ka pyrthei, ha ka por lyiur bad kumta ka White House, ka dang pynkhreh ia ka jingstad jongka, na ka bynta ban khang noh ia ka jingshit tasam jong ka sngi, ba kan nym thang jubor ia ka pyrthei bad ba kan nym poi sha ka iap ka duh jong ki jingim lane sha ka jingtyrkhong ka rep ka riang bad ki um ki wah.
Ki don ki saiantis, kiba shim, ba kane ka rai ka lah ban pynmih ia ka jingktah kaba pynsniew pynban ia ka longbriew manbriew lane ia ka jinglong jingman jong ka pyrthei, hynrei na ka liang U President ka US, U Joe Biden, u plie ia ka mat ban iakren, halor kane ka phang, kaba ym pat ju don ba pyrshang satia mynshwa.
Ka kaiphod jong ka White House, kaba la pynmih ha ka sngi thohdieng, ka shim ia katei ka jingmut, ban pynthanda ia ka pyrthei, lyngba ka jingstad, kaba ki shim, kaba la tip, kum ka solar radiation modification (SRM).
Kawei na ki mat, kaba ki stad ka US, ki buh, ka long ba kin kynshait kham bun ia ka aerosols ha ka stratosphere bad katei kan khanglad ia ka jingshit tasam, kaba ka sngi, ka thang sha ka pyrthei; katba kawei pat ka jingmut, ka long ban theh shibun da u lyoh ha ka duriaw, na ka bynta ba un kiew shajrong lane ban pynduna noh ia ka jingmih bun ki lyoh rit ha ka haw haw, namar ba kitei kim lah satia ban khang ia ka jingshat jong ka sngi.
Hynrei, ki don pat ki stad, kiba shim, ba katei ka jingkhang lynti, ka lah ban ktah da kumwei ia ka pyrthei, namar ba ka sngi, ka lah ban sa iaid noh da kawei pat ka lynti bad sa kawang tyngeh ia ka pyrthei, ha kawei pat ka rukom bad don ruh kiba pynsngew ba kane ka jingstad ka lah ban ktah ia ka jinglong jingman jong ka mariang, ka jingthung ia ki jhur ki jhep, ia ka bam ka ding bad kan ktah wat ia ka koit ka khiah jong u briew ruh.
ngin kynmaw ba u Blei u dei u nongthaw ia ka sngi, ia ka dujok bad ia ka pung ka ding.