Da ka jingialang bah, yn pynjur dawa jylla ‘Garoland’ ki 2 kynhun

Shillong:Ka Garoland State Movement Committee (GSMC) bad ka National Federation for New States (NFNS) ki la pynbna ban pynlong da ka rally paid bah ha ka 29 tarik Ri saw ban pynjur ïa ka jingdawa Jylla “Garoland”.

U Deputy Chief Executive Member (DyCEM) ka Garo Hills Autonomous District Council (GHADC) bad Vice President ka NFNS Nikman Ch Marak, u pyntip ba kane ka rally paidbah kan long ha madan Teteng Aja, Tura ha kaba ki nongïalam jong ki kynhun dawa la ka jong ka Jylla, na kylleng ka Ri, kin wan ban ïashimbynta lang.

U Marak ha ka kyrwoh, ula kyntu ïa baroh ki nongïalam ban ïasnohkti lang ha kane ka jingdawa ban pynïoh noh la ka jong ka Jylla Garo.
“To ngin ïa mihlang baroh khlem da kheiñ shynrang ne kynthei, niam, kur, jaitbynriew, kyrdan pule bad kiwei kiwei namar ka jingïatylli kaba lah ban weng ïa baroh ki diengpyngkiang,” ula ong.

“Lada ngi ïatreilang, baroh kiba long suda. Ngin lah ban tem ïa ki jingeh kiba kah ïa ka lynti jong ngi. Baroh ki Nongïalam na ki kynhun sengbhalang ruh ki long kiba lah pdiang sngewbha. Ngi donkam ban kyrshan markylliang ban lah pynurlong ïa ka jingdawa ‘Garoland’ kaba la don la slem bha,” ula ong.