Jowai: Ki Nonghikai Contract ha ki LP School bapher bapher ha rilum West Jaintia Hills hapoh ka lama jong ka Contractual Teachers’ Association All Jaintia Hills Unit ki la ia mih paidbah sha surok ban iakhih da ka jingiaid paidbah ba jai jai ban pyrshah jur ia ka jingthmu jong ka sorkar ban beh kam noh ia ki bad ban thung bujli da kiwei pat kiba la pass ia ka Meghalaya Teacher Eligibility Test (MTET).
Ka Secretary ka Association ha West Jaintia HIlls, ka kong Arbihlang Suchiang haba kren sha ki lad pathai khubor ka la iathuh ba ki don haduh kumba 1200 ngut eiei ki nonghikai kiba la iakhun ia ka MTET exam hynrei tang kumba 10 percent ki la pass.
“Ngi dawa ba ka sorkar kan ailad ia ki ban ia khun biang kumba ka la ju ailad ia kito ki bym lah pyndep ia ka D.E.L. Ed bad kumjuh ia kito kiba duna ia ka 45 percent ha ka Class XII”, da kaba bynrap ruh ba lada ka sorkar kan weng noh ia ki nonghikai tang namar ba kin lah ban pyndep ia ka MTET nalor ba ki la hikai slem slem bha mynta shano kin leit trei pat bad kumno kin ioh ban pyndap pynbiang ha iing ha sem.
Ka jingiaid paidbah mynta ka sngi ka la sdang na Lad- Kiang Nangbah College ter ter sha Iawmusiang bad shaduh madan Jrisalein.
Kane ka rai ka sorkar ban thung kam noh da kiwei ha ka jaka jong ki ka la jia hadien ba ka sorkar ka la pynbna ia ka result jong ka MTET naduh u bnai Rymphang 25, 2020.
“Ngi la dep ban ai jingthoh bad iakren ruh bad u Myntri ka tnad badei peit ia ka pule puthi ha ka jylla, hynrei na ka liang jong u, u la ieng skhem ban thung bujli beit da kiba la pass ia ka MTET.
“Ngi kum ki nonghikai kiba la hikai la bun bun snem, ngin ia iakhih tyngeh lada ka sorkar kam ailad ia ki sa shisien ban iakhun ia ka MTETexam”, la ong ka kong Suchiang kaba kren na ka bynta ki nong hikai.
“Balei ka sorkar kam pyrkhat satia ia ngi, bun na ngi ki ba la kut ka rta wad kam, ngi wad kam shuh shaei, ka ladei ban ailad ia ngi”, la bynrap kawei pat ka Nonghikai kaba la kham heh ka rta.
Ha kajuh ka por na ka liang u Vice President ka Federation of Khasi-Jaintia and Garo, West Jaintia HIlls u Danny Shadap u la ong ba na ka liang ka seng jong u kan ai ka jingkyrshan kaba pura ia ki nonghikai bad kan iai ia snohkti ha kino kino ki jingiakhih jong ki nonghikai.
Phi don ban ong eiei?