Da ka jing iakhih ba tyngeh, byrngem ka HITO, lada ka sorkar, kam pynbeit ia ki jingdawa ki nonghikai

Shillong:Ka Hynñiewtrep Integrated Territorial Organization seng kmie (HITO), ka la byrngem ban pynlong ka jingïakhih kaba tyngeh, mynta ka sngi lada ka sorkar kam khot ïakren ban pynbeit noh ïa ka jingdawa ki nonghikai skul kontrak kiba la pynlong ka jingïakhih, mynta la jan dap shi bnai.

U Bah Donbok Dkhar, President ba rangbah jong ka seng haba ïakren bad ki nongthoh khubor u la dawa ba ka sorkar kan ai noh da ka jingthoh sha ki nonghikai bad pynbeit noh ïa ka jingdawa jong ki bad maham ruh ba lada ka sorkar kam lah ban pynbeit, ka seng kan sa shim da ka sienjam kaba tyngeh.

U la ong ruh ba lada ia ki nonghikai ha Ri lum Garo, ka sorkar ka la thungkam biang, kumjuh ruh ka dei ban leh lang ïa ki nonghikai ha rilum khasi bad jaiñtia, hynrei kane ka dei ka jingleh shiliang khmat ka Sorkar MDA. Ka seng lyngba u Bah Donbok ka la dawa ruh ïa ka sorkar ba ka dei ban sospon shipor ïa u Inspector ryngkat uwei u pulit uba khlem phong Uniform uba la wan kawang tiar Gas ha khmat ki nonghikai.

Shuh shuh u Bah Donbok, ula pynrem ïa kane ka jingleh ka police department kaba la pheil, nadong sha dong, namar wat ïa ki khynthei kynnah, ki la pyni bor da kaba tynruh da ki lathi bad ruh ia khynthei la shu shah kyrjiaw pylleiñ pylleiñ ha ki pulit shynrang kaba khlem la buh ia kita ki pulit khynthei kat kum ka aiñ kaba ia dei ia ki khynthei.