Da ka ILP, kwah ki Sengbhalang na ka Sorkar

Shillong, 3 Lber:
Ki 13 tylli ki seng bhalang kiba dawa ban pyntreikam ia ka Inner Line Permit (ILP) ha ka jylla ki la rai ban phah ia ki mat kiba iadei na ka bynta ban pynkhlain ia ka ILP ha kane ka jylla khnang ban khanglad ia ka jingwan tyllep ki briew ba nabar. Ki sengbhalangkiba shong jingialang hynne ka sngi ki la rai ban phah ia ki kattokatne ki bynta ban pynkhlain ia ka ILP.
Ha kane ka jingialang la wan ban iashim bynta ki 13 tylli ki sengbhalang kaba long ha ophis ka KSU ha Jaiaw.
“Ngi la pynkhreh ia ki mat ban ai jingmut sha ka sorkar ban pynkhlain na ka bynta ban pyntreikam ia ka ILP khnang ban tehlakam ia ka jingwan rung ki briew nabar sha kane ka jylla”, la ong u President ka FKJGP Bah Joe Marwein hadien ba la wai ka jingialang.
Kham mynshwa, ka sorkar ka la phah shuh sa 22 tylli ki mat sha ki sengbhalang halor ka ILP ba kam long kaba suk ban pyntreikam.
“Ki mat ban ai jingmut sha ka sorkar halor ka ILP, kin nym ktah satia ia ka roi jong ka jylla kumba la pyntiengkohtympang ka sorkar”, la ong u Bah Marwein. U la ong ba ki sengbhalang kin iakynduh shen ia ka sorkar jylla ban aiti ia ki mat jingai jingmut halor ka ILP.
Kumjuh u president ka KSU u samla Daniel Khyriem u la ong ba ki mat ba ki sengbhalang kin sa aiti sha ka sorkar kin long ban thung bniat shuh shuh halor kumno ban pynkhlain ia ka ILP ban khang lad ia ka jingwan rung pathar ki briew nabar sha kane ka jylla.
U general secretary ka HNYF u Bah Sadon K Blah u la bynrap ba ki mat ba ki sengbhalang kin ai sha ka sorkar ka long katkum ka ILP ban iadei bad ki jingdonkam jong ki paidbah kane ka jylla.
Lah ban kdew ba ka sorkar ka la phah pule haduh 52 tylli ki ain kiba iadei ban khang lad ia ka jingwan ki briew nabar sha kane ka jylla.
Hynrei na ka liang jongki, kim pat kwah ban pynpaw kiei ba kin leit aiti sha ka sorkar. “Ngi la thmu ban pynkhlain ia ka ILP”, la ong u samla Khyriem.
U samla Khyriem u la ong ba kin ai jingmut sha ka sorkar halor ka jingdonkam ban pynkhlain ia ki ain kum ka Land Transfer Act, Benami Act, Trading By Non-tribal bad kiwei de.