Shillong:Ka FKJGP Sengkmie hadien shisnem tam ka jingiaid lynti haba iadei bad ka Socio-Economic Movement, mynta ka kynti ka la plie paidbah syndon ia ka ophis treikam jong ka East Khasi Hills Agriculture Cell ha shnong Mawlyngad ha ka 22 tarik Naiwieng 2018 kaba la jer kyrteng ia ka “Ka iing U Nongrep” da u bah Ronnie Wahlang (MCS) BDO jong ka Mawryngkneng Block, ha kaba la wan ban ia shim bynta da ki spah ngut ki Nongrep na ka thain bad ki Shnong bapher bapher jong ka East Khasi Hills Districts. Ka jing thmu jong ka Seng ban plie ia kane ka iing U Nongrep ka long hadien ba ka Seng ka la ioh ia ka jing ujor na ki paid nongrep na kylleng ka ri haba iadei bad ka jingeh kaba ki ia kynduh haba iadei bad ka kam ka jong ki khamtam ka jing hiar dor jong ki mar rep ban ia nujor bad ka jinglut jingsep ka jong ki kam ia hap shuh. Ka Seng hadien ka jing leit jurip bad tih bniah ia kane ka long ka daw tynrai, ka lap ba ka dei na ka jing bym ia long kawei jong ki paidbah nongrep ha ka por ban leit die ia ki mar rep jong ki kaba pynlong ia ka jingshah shim kabu ha ki nongthied. Ka Seng ka shem ruh ba ka jing bym shim khia ka Sorkar lyngba ka tnat Agriculture Marketing Board ia kaba la dei ban buh noh ia ka dor jong ki mar rep bapher bapher kum ka Minimum Support Price bad ka Seng ruh ka shem ba la donkam ban wan rah ia ka rukom pyrkhat kaba thymmai kat kum ka juk ba mynta ia ka rukom die ne shalan ia kine ki mar rep na kane ka jylla. Ka Seng lyngba kane ka iing kan lum kan lang ia ki paidbah nongrep bad btin lynti ia ki nangne sha khmat bad kane ka iing long kum ka Model project jong ka Seng bad lada kane ka jingthmu long ka ba sei soh ka Seng ka sa pyn pur pat sha kiwei ki District.
Ha kane ka jingialang la ia don ryngkat lang naduh ki Sordar shnong jong ki shnong bapher bad ki Nongialam jong ka FKJGP Sengkmie bad ki nongialam jong ki district bad ki circle bapher bapher. Ha kane ka jingialang la ioh ka jingkren U Sordar jong ka Mawlyngad bah E.Kharbihkhiew, bah Marco Mitri Associate Professor UCC, Samla Daniel Ramsiej field supervisor Citizen foundation, bah Generous Warlarpih Vice President KJBWA,bah Dundee Cliff Khongsit General Secretary,bah Wellbirth Rani President jong ka Seng uba long u Symbud Kongsan ia kaba u la kyntu ia ki paidbah nongrep ba kim dei ban duh mynsiem ne duh jing kyrmen ka Seng ka don rynkat bad ki ha kino ki liang haba iadei ban kyntiew ia ki kam rep ka jong ki bad la ioh ruh ka jingkren na u bah Ronnie Wahlang uba long u Kongsan ia kaba u la pynpaw ka jing sngewkmen ban iohi ia kane ka jing shim khia jong ka Seng ban kyntiew ia ki paidbah nongrep da kaba plie syndon ia ka iing u rep ha katei ka thain ban u kyntu ia ki paidbah nongrep ban shim ia kane ka kabu, ba la wan rah da ka Seng FKJGP bad kumno ma ki ruh ki dei ban shim khia ia kam kaba ki trei bad u la kular ruh ba na ka liang jong ka Block office jong ka Mawrynkneng kan ai ia ka jing kyrshan ba rad bah ia kane ka jingthmu babha ka Seng.
