Da ka Hillstorm kyndang ki pulit, ia ki ktem ka GNLA ha lum Durama

Shillong, 26 Rymphang: Ki pulit ka Meghalaya ki la pynlong ia ka jingkhynra naphang ia ki ktem jong ki GNLA, lyngba ka Hillstorm ha u lum Duran. Katkum ka khubor na ki pulit, la ong ba hadien ba la ioh ia ka jingtip ia ka jingrieh tngen jong ki dkhot ka GNLA bad jaka hikai jongki, ba la iarap da ka ULFA, ki pulit lem bad ki pulit sorkar pdeng ki la pynlong ia ka jingkhynra ha katei ka thain bad ki la ioh ban pynlko pom ia lai tylli ki ktem jongki.
Ki pulit ki la ong ba ki GNLA ki la buh ia ki jaka hikai hajan ki shnong briew bad ki la pynap shrip ruh da ki bom IED ha baroh ki lynti iaid ban poi sha jaka ba ki shna ktem. Kine ki lynti ki dei ba ju iaid bha ki briew nongkyndong ha katei ka thain bad ki lah ban buh jingma ia ki lada ki bthei kynsan.
Ban pyndem ia ki dkhot ka GNLA ha lum Durama, ki pulit ka Meghalaya bad ki SWAT lem bad ki pulit ka Central Police Forces, ki la pynlong ia ka jingkhynra ha katei ka thain hynnin ka sngi bad ioh kurup bun ki tiar ialehkai jong katei ka seng. Ki la ioh ban pynpra ia ka ktem jong u Rupanto Marak u Dy CnC ka GNLA.
Ki pulit ki la ioh kurup ruh ia 46 tylli ki bom IED hadien ba la iasiat kaba shyrkhei bha bad ki lehnoh GNLA ha katei ka jaka. U Deputy CnC u Rupanto u la shah tangon ha ki pulit bad kiwei dang pynlong ia ka jingkhynra.
Ki pulit ki la ong ba ki la ioh jingtip ba ka GNLA ka la ioh jingiarap na ka ULFA (I) ban ai jinghikai bad ruh ban shna bom IED. La iathuh ba u Dristi Rajkhova, u Dy CnC ka ULFA(I) bad ki dkhot jongu ki la sah lang ha jaka sah jong u Sohan ha u bnai Nohprah 2015 bad hikai ban shna bom IED.
Haduh mynta ki pulit ki la ioh kurup IED 46 tylli hynnin ka sngi bad 16 tylli mynta ka sngi.
Ha kane ka jinghiar khynra ki pulit, u Sohan u la her krad noh na jaka sah. Ka jingkhynra ka dang iaid ban kem ia u bad kiwei ki dkhot, la ong ki pulit.
Ki pulit ki dang pynlong ia ka jingkhynra kaba jur bha ha ki bynta bapher bapher jong ka East Garo Hills, West Garo Hills, South Garo Hills, North Garo Hills bad ka South West Garo Hills.
Ki la ioh kem ruh uwei u dkhot ka GNLA na shnong Daribokgre ba don ha kjat u lum Durama. Une uba shah kem la tip kyrteng kum u Everson S Sangma uba hap ha ka jingpeit jong u Nun ha ka thain Daribokgre. U Everson u dei u dkhot ba shah thwet bha ha ki pulit halor ka jingdonkti ha ki kam rahbor ia u nongniah ka JCB bad u nongbylla na Ganol Apal ka Tura Police Station.
Kane ka jingkhynra ka la leh lai kynta 48 minit, la ong ki pulit.