Shillong:Ka sorkar jylla ka la mynjur ban thaw ia ka Meghalaya Recruitment Education Board, na bynta ban pyniaid ia ka jingthung kam ha ka tnad pule puthi ha ka rukom kaba sted.
Ia kane ka rai la shim ka kynhun myntri mynta ka sngi, bad u Myntri Rangbah ka jylla u Conrad K Sangma ula ong ba kane ka Board kan pyniaid ia ka jingthungkam ia ki nonghikai hadien ba ka MPSC, DSC kam lah ban pynlong ia ka eksamin ha ka por kaba biang bad dang shen, ka sorkar ka la thaw ia ka Health Recruitment Board bad ka la pynrung kam haduh jin 500 ngut ki doctor tang hapoh lai bnai. Kane ka juh kan treikam na bynta ki 187 tylli ki kam kiba dang sah thylli haduh mynta ha ka tnad pule puthi khamtam ha ka Higher bad ka Technical Education.
“Ki don ki khep ha kaba ki kam ba lait ki shu sah kumto haduh 3-4 snem bad kane ka la buh jingeh ia ka tnad bad ktah ia ki kam ki jam. Ngi sngew ba ka donkam ka Board ban pynbeit ia kane ka jingdkoh. Kane ka Board kan pyndep ia ka jingthungkam hapoh 6 bnai”, la ong u Conrad.
Kane ka Board kan pyniaid ia ka jingthungkam ha baroh ka tnad pule puthi ha kaba, yn khlieh da u Additional Chief Secretary ba peit ia ka tnad pule puthi ryngkat 9 ngut ki dkhot.
Ha kajuh ka por, ka sorkar ka la mynjur ban jer kyrteng thymmai ia ka tnad Labour sha ka Department of Labour, Employment and Skill Development.
u Conrad Sangma u la dep beh kam ia ki 1200 ngut ki nonghikai lps,,khnang ban ioh thung kam ia ki ba don jing iadei…..u Conrad Sangma u kmen bha ka mynsiem haba u tip ba ki 1200 ngut ba u la behkam ki ia im sohsat im jingjar mynta…..ka ia kan sa batai