Shillong: Ka Khasi Students’ Union (KSU) Nongtyngur Unit ha ryngkat ka jingsynran lang u Samla Richard Mawkhiew, General Secretary KSU Nongthymai Circle bad ki katto katne ki dkhot na nongbah Shillong ka lah ioh ban kynduh markhmat ia u Bah Andy Rayner Lyngdoh, Assistant Manager ka Jio telecom mynta ka sngi ka 20 tarik u Naitung 2021 hapoh ka Ophis jong ka jio kaba don ha Fire, Brigade Shillong.
Ha katei ka jingiakynduh ka seng ka lah ioh ban aiti ïa ka shithi ujor halor ka jingtlot palat ka Jio Telecom ban ai ia ka jingshakri ha ka dong ka thaiñ kaba buh ha ki jingeh kiba khraw ïa ki paidbah kiba pyndonkam bad khamtam ki khynnah pule kiba shaniah tylli tyllang ha ka Internet ia ka jingpule bad ka eksam jongki ha kum kane ka por u Khlam Covid-19 katkum ka juk ba mynta.
Shuh shuh ka seng ka pynpaw ha khmat u Assistant Manager ba ka jingujor jongka seng lyngba ki kyrwoh kiba lah phah lyngba ka Email, WhatsApp bad ka jingkren lyngba ka phone Calls ïa ki nongtrei ka Jio kiba peit ha ka dong ka thaiñ kadei kaba lah bunsien hynrei ki nongtrei kim shimkhia halor ka jingujor.
Kumta ha ka jingiai buddien ka seng ban weng ia ki jingeh ki paidbah, ka lap lyngba ka jingiathuh u nongap pahara jong u tower ba ki nongtrei kim ju wan peit tista ban wan peit wan sumar ban kim bujli wat ia ki tiar ki tar jong u tower kiba lah sniew.
Kumta hadien ba ka Seng ka lah dep ban pynpaw shai ia ki jingeh kiba iadei bad katei ka jingujor, na ka liang une u Assistant Manager ka Jio Telecom ruh u lah kular skhem hakmat ki nongialam ka seng ba lyngba jong u katba lah un pyrshang kham kloi ban pynbit pynbiang ia ki jingdonkam baroh kiba iadei bad kiba mih na ki jingthut ki tiar ki tar bad ki kor ki bor kiba iadei bad ka jing bym treikam ka network.
Khatduh na ka liang ka KSU ka pynpaw shai ba lada ka Jio Telecom ka iai leh bym suidniew halor ki jingujor ka Seng, ka seng ruh kan sa shim noh da ki sienjam kiba kham tyngeh bad wat haduh u pud ban khangtala shisyndon ia ki Tower kiba don hapoh ka dong ka thaiñ, ong ka kyrwoh na u samla Therbor Khongtani, General Secretary KSU Nongtyngur Unit.
Phi don ban ong eiei?