Da ka Boundary Committee, ong ka kong Ampareen ia ka sorkar

Shillong: Ka MLA ka party Congress ka kong Ampareen Lyngdoh ka la ong ba lada ka sorkar jylla ka kwah ba ki paidbah ki don jingshaniah, ha ka ba iadei ban pynbeit noh ia u pud u sam hapdeng ka jylla Assam bad Meghalaya ka dei ban thaw da ka Boundary Committee, ki ban kynthup ia ki seng sainpyrthei bapher bapher bad ki sengbhalang bapher bapher.

Haba iakren bad u Rupang, ka Kong Ampareen Lyngdoh ka la ong ba ka jingjia ha Mizoram ka la pynshaiong ia ki paidbah bad ka jingjia ha ka shnong Iongkhuli, ka ba dei ka shnong ka ba rit, hynrei haduh 3 kali ki shipai Assam ki wan ban thombor kane ka pynsngewsih ia u paidbah bad ka donkam ban buh jingkylli balei kine ki jia.

“Dang mynshisngi dang shu dep ban ia kren hapdeng ki heh sorkar, kynthup ia u Myntri kampohing ka sorkar India u Amit Shah, u Myntri rangbah ka jylla Assam bad Myntri rangbah ka jylla Meghalaya u Conrad K Sangma halor ban iaid shakhmat ban pynbeit noh ia u pud u sam,la ong ka kong Ampareen.

“Ka rukom pynbna ha ki lad pathai khubor ka long thik kum ba ki la tip kaei kaba ki dei ban, leh hynrei mynta ka sngi ngi iohi ia kum kine ki jingjia ki ba pynshaiong ia u paidbah ha ka jylla”ka la ong.

Ka la ong ruh ba ia ki kam pynroi ki wan ban pynthut, kumto kata ruh tang hapdeng ar sngi ba ki heh sorkar ki la dep ban shim rai ba kan ym don ka no kano ka jingpynthut na liang ka Assam ne Meghalaya.

Ka la ong ruh “Ka jingiakren halor u pud u sam lada ngi ieh tang ha ka sorkar MDA lehse ki heh NDA kin niom ia ka sorkar jong ngi ka ba shu ngeit beit ia kaei ka ba ka sorkar India ka rai. Ka sorkar MDA ia ka jingdawa ILP ka khlem kyrshan lang, ia ka jing dawa ban kynthup ia ka ktein khasi ha ka khyrnit ba phra lei, u khlem shah ban ia kren, kane ka pynartatien ba kane ka sorkar kan lah ban iasaid na ka bynta ka jylla.”
Ka la ong ba la i donkam ban thaw da kawei ka Boundary Commitee ka ba dei ban kynthup lang ia ki party seng sain pyrthei bapher bapher bad ki sengbhalang khnang ban lah ban ieng skhem ban lait na ka jingshah thombor ka sorkar NDA ia ka sorkar MDA.