Da ka bill kaba 700 pound, dawa U Mayor ka London na U Donald Trump, ba u wan rah 20 tylli ki kali

U Sadiq Khan, U Major ka London, ula kynnoh ia U Donald Trump, U President ka America ba u dei u briew, uba mynthi tasam.

U President, ula iaid da ka kali kaba remdor tam jongu, kaba shongdor £1.8million, kaba la khot kyrteng The Beast lem bad 20 tylli kiwei pat ki kali, haba u leit jngoh ia ka United Kingdom ha ki khyndiat sngi ba ladep.

Hynrei la iathuh ba kitei ki kali, kiba la shu phah da ka jhad ba kin wan na America sha London, kim shym la siew satia ia ka bai iaid jongki ha surok jong ka nongbah London, kaba long £11.50 shisngi, kaba poi sha ka £700 haba ki iaid na ka bynta lai sngi.

Ka tnat Transport for London, ka la ai ia katei ka bill sha ka US Embassy bad la iathuh ba katei ka tnat, ka ka la shah ram lypa £12.4million sha ka sorkar America. Ka America, ka kyntait ban siew ia katei ka pisa, namar ba ka shim ba ki heh sorkar, kim ju siew khajna.

Katei ka tnat ka iathuh ba kine ki ophis kiba nabar ri, kim ju siew satia ia katei ka bill, haba ki wan ki heh ki hain kiba na shabar ri, kaba poi mynta sha ka £116million bad lait na ka America, ka Japan, ka pynshah ram kaba long 8.6million pound.