Da ka ban khang tala, ia ka CHC Nongtalang, byrngem ka KSU

Shillong:Ka Khasi Students Union War Jaintia Circle, myn hynnin ka sngi, hapoh ka jing ialam u Samla Laitphar Syngkrem, President, Samla Lurman B Talang, General Secretary, Samla Kindly Khyriem, Finance Secretary nalor kiwei pat, ki la leit jurip ia ka Nongtalang CHC, hadien ka jingioh jingujor na ki paidbah halor ka jingdkoh treikam kane ka jaka ai jingsumar.

Halor kane ka jingjurip ka seng ka lap ba ar bnai kynthih u Doctor Incharge jong kane ka jaka ai jingsumar u don hapdeng ka jingshitom bad ki paidbah kiba pang ba shitom ki shem jingeh halor ka jingbym biang ki doctor. Te halor kane ka bynta haba ka seng ka twad jingmut na ki nongtrei, kiba don hangto ki iathuh don uwei u Doctor ha kane ka jaka ai jingsumar, te na ka liang ka seng ka la pyrshang ban iakynduh ia u, hynrei um shem la treh ban iakynduh bad iamir jingmut hynrei u ong pynban ba um don shuh hapoh ka duty. Kumta na ka liang ka seng ka dap da ka jinglyngngoh kaba khraw ba kum ki Doctor kiba ai jingshakri ia ki paidbah khamtam ha kaba iadei bad ka koit ka khiah hato ym lah mo ban iakynduh ne iamir jingmut na ka bynta ka jingbit jingbiang jong kane ka jaka ai jingsumar kaba mut lada don nongpang kiba long emergency ruh ym long ban sumar namar ba la off duty.

Shuh shuh ka Seng ka la ioh ruh ia ka jingujor na iwei na ki riew paidbah ki bym kwah ban pynpaw kyrteng ba ha ka miet 29 tarik u bnai ba la dep ba ha kane ka jaka ai jingsumar kim treh ban pdiang ia kine ki nongpang bad ki ai daw ba ym don doctor bad kim banse ban leit phai noh halor ka jingshitom. Ka Seng halor kane ka bynta ka dap da ka jingbitar bad ka kyntu ia ka Sorkar lyngba ka tnat ka koit ka khiah ba kan shimkhia mardor halor kane ban pynbiang ia ki jingdonkam ha kane ka jaka ai jingsumar bad ban tohkit bniah halor ka jingbym pdiang ia ki nongpang ha kane ka jaka ai jingsumar. Na ka liang ka seng kan sa leit jurip biang sa shisien ia kane ka jaka ai jingsumar bad lada lap sa shisien ba ka long kumjuh, kan khang tala shisyndon ia kane ka jaka ai jingsumar namar ym myntoi ban don tang ka iing khlem ki nongsumar ia kiba pang ba shitom.