|
Jowai: U bah David Kharsati uba dei u Vice President ka BJP ha ka jylla u la ther tyngeh ia ka seng Congress halor ka jingkynnoh bad jingkren bein ba ka BJP ka dei ka seng pyrshah Khristan.
U bah David haba kren ha ka jingialang kaba kyrpang u kyrtong ka BJP, u ma Lakhon Biam ha iing jong u ha Nangbah hynnin ka sngi, u la ong ba wat lada ki shah kren bein, khlempep ngi ioh ban synshar bad ynda ngi jop ngin bam don masi baroh shi taiew lynter ban pynshisha ba ki jingkynnoh ka Congress ki long kiba bakla.
Utei u heh ka BJP u la kynthoh tyngeh ruh ia ka party NPP kaba la ialam da u MP ka Tura, u Conrad Sangma. U la ong ba ba NPP ka don ka jingthmu ban klun lut ia ki jaka ki puta ka jait bynriew hynniew trep kaba don sha ka thain West Khasi Hills ban pynhap ia ka sha ka Greater Garo Land.
“Lada ka NPP ka ioh ban synshar, lai powa ka West Khasi Hill kan leit sha ka Greater Garo Land katkum kane ka Map”, la ong u bah David uba la rah shajrong ia ka Map jong ka Greater Garo Lands ban pyni sha ki paidbah ha katei ka por ba u la ai jingkren na ka bynta u ma Lakhon u kyrtong ka BJP.
Hynrei wat lada u kren bad kner ia la ki kti ban pyni ia katei ka map, ym shym la ai satia ban shondur ia ka da ki katto katne ki nongthoh khubor kiba don ha katei ka por.
U ma Lakhon Biam u la khot la wer ia ki paid nongkyrshan jong u hynnin ka sngi na kylleng ki shnong bad u la pan ia ka jingkyrshan jong ki paidbah bad u la kyntu ruh ia ki ban trei shitom ban khot ban wer ia kiwei kiwei ki nongthep vote jong ka 3 Raliang.
Ha kane ka sngi la pyniaid ia ka jingialang da u ma Raplang Thubru ha ka jingiadonlang u ma HB Dann President ka HSPDP bad kiwei kiwei ki riew rangbah na ki shnong bapher bapher nalor ym duna ia ki 1500- 2000 ngut ki paidbah nongkyrshan jong u ma Lakhon.
|