Da dap ka jylla 50 snem, ym don shuh uba duk, ong u Mukul

Shillong, 09 Lber:
U Myntri Rang bah ka jylla u la ong ba ka thong jong ka sorkar jylla ka long ban rat dyng khong noh ia ka jingduk bad ynda dap ka jylla 50 snem; yn nym don shuh uba duk. U Mukul Sangma u la jubab ia ka jingkylli mynta ka sngi halor ka skhim IBDLP hapoh ka iing dorbar thawain ka jylla ba la wanrah da u MLA ka Nongkrem u Bah Ardent M Basaiawmoit.
U la ong ba ka sorkar jylla ka la pyntrei kam ia ka IBDLP da kaba teh lang bun ki tnad treikam sorkar ban pyn long ia ka skhim kaba jop kum kaba ai jinghikai ban seng kam seng kam, ri jingri, thain bad kiwei kiwei ki kam.
“Da dap ka jylla 50 snem, ka dei ban lait na ka jingduk, ka dei ka thong kaba eh hynrei ka sorkar ka don ka thong ban leh ia kane”, la ong u Mukul.
Hynrei na ka liang u Saleng M Sangma uba kylli bynrap, u la ong ba kane ka skhim kam myntoi satia namar ba ka sorkar kam shym la lah ban plie lad ia ki nongrep ban pyniaid iew ia ki mar bad kawei ka long ba ka ram kaba heh bha bad ka grant pat kaba rit bha. “Ka sorkar ka ai skhim 50 hajar, tang 5 hajar ka ai grant bad kaba tam, ki hap siew kum ka ram, shaei ki nongrep kin ioh myntoi kum kane ka jingiarap”, la ong u Saleng.