Shillong, Nailur 09: Ka Mynken Christian Higher Secondary School, Ri-Bhoi District kaba la mihkhmat ïa ka jylla Meghalaya sha ka lympung ialehkai U-17 boys’ Subroto Cup 2024 ha nongbah New Delhi ka la pynthikna ïalade ban jam sha ka wat ïakhun ba khadduh (final) hadien ba ka la pynliem kput ïa ka Arunachal Pradesh haduh 7-0 kol ha ka semifinal ba nyngkong ha ka Lah Sngi U Blei ka 09 tarik Nailur 2024.
Da kane ka namjop ka jylla ia ka Arunachal Pradesh kan sa ïakhun pyrshah ïa ka Manipur ha ka wat ba khadduh kata ha ka sngi Balang na ka bynta ka jingiakhun namlahduh.
Ha kane ka jingïakhun la sakhi ruh sa shi sien ki hat trick na u Banganson Nongphlang u ba la thep ar kol ha ka kylla step bad kynjoh lai kol ha ka kylla miet, kaba la ai mynsiem ïa ka Meghalaya ban pynjemkhnap ïa ka Arunachal.
U Banganson u la pynkhih ïa kine ki lai kol ha ka 21, 35+1 bad 46 minit. Katba u u Alicestar Thangkhiew u la ïoh ban thep ar kol (44 bad 51minit), nangta u Mebanlamlynti (39 minit) bad u Mebankhraw (65 minit) ki la ïoh ban thep mar shi kol.
Lah ban kdew ba hadien ki ar kol na u Banganson, kaba la ktah bad pynduh mynsiem shibun ïa ka Arunachal kadei ka kol kaba lai na u Mebanlamlynti katba ka Meghalaya ka la nang ïohbor ban tehlakam hi dalade ïa ka jingïakhun. Hadien kane u Alicestar u la pynkhih ar kol, nangta u Banganson u la lah ban kynjoh ïa ka hat-trick shuwa ba u Mebankhraw un pynkhih ïa ka kol kaba khadduh ha ka 65 minit.
Da kane ka namjop ka Meghalaya kan aireng pyrshah ïa ka Manipur ha ka wat ba khadduh (final) la Sngi balang. Na ka liang jong ka Manipur pat ka la pynliem noh ïa ka Sri Lanka da 1-0 kol ban rung sha ka final.
Kumban shu pynkynmaw, ka jingïaid lynti jong ka Mynken Christian Higher Secondary School ka la seisoh bha da kaba wan hakhlieh duh ka miej kheiñ point na ka Group F hadien ba jop baroh lai sien lynter ki jingïalehkai pyrshah ïa ka Bihar (5-0 kol), Chandigarh (1-0 kol) bad ka Dadra & Nagar Haveli and Daman & Diu (23 kol). Hadien nangta ka la lah ban pynliem ïa ka CISCE (Minerva Punjab) da 3-1 kol ha ka quarter final.
Phi don ban ong eiei?