Shillong: Ka sorkar Meghalaya, ka la pynmih ia ka kyndon kaba kham kyrpang, na bynta ki myntri sorkar bad ki briew sorkar, kiba leit jingleit shabar jong ka Jylla.
Katei ka dei ka kyndon, kaba la pynmih da ka tnat ka koit ka khiah ha ka sngi hat majai.
“Katba kum katei ka kyndon, ka long kaba donkam ia ki myntri sorkar bad ia ki briew sorkar ba kin pyndep ialade ia ka RT-PCR, shabar jong ka Jylla” ong U bah Prestone Tynsong, Deputy Chief Minister ka sorka Jylla, hynnin ka sngi.
Ka la mih ka jing shah wohnia ia U Conrad K Sangma, myntri rangbah ka Jylla, namar ba u leit sha Manipur bad wan phai noh ha ka Sngi U Blei bad ba u khlem leh quarantine satia, kumba la buh kyndon da ka sorkar jylla.
U Conrad, ula leit sha Manipur ha ryngkat bad U Himanta Biswa Sarma, myntri ka koit ka khiah ka sorkar Assam, na ka bynta ban teh lakam ia ka jing ia kynad ha ka sain hima sima ha katei ka Jylla, hynrei hynnin ka sngi, la test ia U Sangma, tangba ka test ka pyni, ba um don jingpang satia.
Haba kren ha ki kotkhubor, U bah Tynsong, ula ong ba na ki kyndon ba la don lypa, la bthah ba kito kiba leit shabar Jylla, kin dei ban shah test da ka RT-PCR bad lada kim don jingpang, kin hap ban iaid sha la ki kam, lem bad ka jing phikir kaba biang bha, hynrei ha kaba iadei bad u Conrad Sangma, u Bah Tynsong, u ong ba um donkam satia ban shong marwei, na ka bynta 14 sngi kynthih.
La ong biang, da U bah Tynsong, ba ki heh sorkar, ki myntri sorkar, ba kynthup ia U Chief Secretary, ki hap ban leit sha ki jingialang sha Delhi bad u ong shuh shuh “Lada ngi dei ban shong marwei, na ka bynta 14 sngi kynthih, kumta ka jingtrei kam jong ka sorkar, kan shah ktah jur bha. Kumta, na bynta kane, ka tnat ka koit ka khiah, ka la pynmih, da ka kyndon kaba kyrpang, ia ki myntri sorkar bad ia ki ophisar, na ka bynta ba ka kam kan iaid beit iaid ryntih”.
Na ka liang U bah AL Hek, myntri ka koit ka khiah, u ong “Ka kyndon ia baroh lang, ka long ba kiba leit shabar ka Jylla bad kiba wan phai noh, lada jia ba ka test jongki, ka long negative, ki lah ban leit sha la ki kam, tangba katba ki dang ap ia ka test report, ki dei ban quarantine”.
lada tang ka RT-PCR ka lah biang ia ki heh ki hain balei phin leh syndon iaki ba rit baria ruh kumjuh khnang ba kin ioh ban leit trei laka kam namar kan ktah jur iaka ing ka sem bad ka trei ka ktah jong ki.