CORONAVIRUS:Ka lockdown bad kumno ban pynlut iaka por?

Kong Linda Kongwang

“Ka jingiada ka kham bha ban iaka jingpynkhiah”. Ia kine ki jingmut kiba shai ym lah shuh ban batai da kumwei pat khamtam ha kum kine ki por katba ka pyrthei ka dang ialeh ban wad iaki jingiada ban lait na u khñiang jingpang Covid-19. Kane ka khlam ka dei shisha ka daw ba baroh ka pyrthei ka sheptieng bad her mynsiem.

Ban shongkhop beit ha iing kadei ka lynti kaba biangtam ban lait naka jingshahktah bad iabit jong une u khñiang jingpang. Bun ki briew ki kham sngewshngain ban shongkhop ha iing ha kum kine ki por pakhang shnong hynrei ban shu shong khop khlem trei ei ei,phin sngew ngiah bad sngewthait kloi ban shongsah hapoh iing. Pynthikna ba phi donkam ban leh ne trei ei ei ha kine ki por ha la iing ban iakaba shu shong jaituh baroh shisngi. Hangne ka jingthoh ka thmu ban pyni kumno ngin pynlut iaka por jongngi haba don ka jingpakhang shnong:–

NA KA BYNTA KA JINGKOIT JINGKHIAH JONGKA MET

1. Dei ban kilan met:— Kadei shisha ka por kaba biang tam eh ban ioh pyllut por naka bynta ialade da kaba kilan met man ka sngi ban ioh iaka jingkoit jingkhiah ba pura jongka met. Phi lah ban pyrshang ia kino kino ki jait jingkilan met kiba thymmai kiba phim pat ju leh bad kiba phi ju leh borabor. Ka shong eh haka mon jongphi, hynrei kaba bha tam ka long ban pyrshang pynkhih ia ka met hi baroh kawei namar kane kan iarap ban pynkoit ruh iaki bynta ba shapoh jong ka met.
2. Bam iaki jingbam tei met:— Ho’oid hapdeng ka jingpakhang shnong bum ki briew kim ioh ban thied iaki jingbam kiba ki ju bam man la ka por, hynrei ban iakaba shu shong ha iing khlem leh eiei, phi lah ban shet kino kino ki jingbam kiban aibor iaphi. Kine ymtang ba kin ai iaphi ka met kaba koit ba khiah hynrei kan iarap ruh iaphi ban nang shet bunjait ki jingbam.
3. Pyrshang ban shad:— La phi dei ne phim dei kita kiba stad ban shad,hynrei ha kum kine ki por kan long ka kabu ksiar iaphi ban pyni iala ki jong ki sap ban pynkhih met da kaba shad. Namar ban shad ymtang ba ka ai iaphi ka met ka phad kaba smat ba sting hynrei ka pynbha iaka jinglong haka rukom pyrkhat, ka jingkoit jingkhiah bad ka jingkilan met bad ruh ka kyntiew iaka jinglong shlur haka jingim.

HA KABA IADEI BAD KIBA HA IING HASEM

1. Ka jingkynmaw iaki por bala leit:–– Ha ka jingim ba man ka sngi, phin ym shuh tharai iakane ka lad ban wanrah biang ia kita ki por ba la leit noh, hynrei phi lah ban shu kynmaw ieid iaki dakaba khmih ne peit lang bad kiba ha iing hasem iaki dur ne ki video kiba phi ju shonlang haki por barim. Da kaba pyllut por lang bad kiba ha iing ha sem ban kynmaw ieid iaki por bala leit noh, kine ymtang ba ki ai jingkmen iaphi hynrei teng teng ki pynjaw ummat daka jingkmen haba ioh ban kynmaw lang shi iing shi sem.
2. Ka jingialehkai:— Kane kadei kapor kaba biang tam ban sngewjan bad baroh kiba ha iing ha sem dakaba phi iohlad ban pyllait por ialade ban ialehkai ne ialehkmen bad ki baroh. Ha kum kine ki por phi lah ban ialehkai kum ki kriket, iarieh, carom board, ludo bad kiwei kiwei de. Da kaba pyllut por ban ialehkai ymtang ba ki ai jingkoit jingkhiah iaphi hynrei ka wanrah ruh iaka jing iaieid bad iajan bad kiba ha iing ha sem baroh.