Coronavirus: Khang skul ka Assam mynta u bnai & 117ngut peit bniah ka Mizoram

Shillong: Kum shi bynta ban khanglad ia ka jing saphriang u khniang jing pang ‘coronavirus’ lane u COVID-19, ka sorkar Assam ka la hukum ban khang lut baroh ki jaka pule kynthup ia ki skul sorkar bad skul shimet.

Nalor ki jaka pule ka sorkar Assam, lyngba u Chief Secretary ka jylla u Kumar Sanjay Krishna ka la pynmih hukum ruh ba dei ban khang lut ia ki ‘Cinema Halls’ ki ‘Swimming pools’ bad ki ‘Gyms’ haduh 29 tarik lber 2020.

U Chief Secretary ka jylla Assam, u Kumar Sanjay Krishna u la ong ba ki jaka pule baroh hapoh ka jylla ki dei ban khang lut lait noh ki eksamin jong ka board CBSE bad SEBA. Ka sorkar Assam ka la thaw ruh ia ka komiti ba lamkhmat da u ‘Nodal Officer’ u Anurag Goel na ka bynta ban peit bniah ia ka jing pang ‘coronavirus’.

Ha ka jylla Mizoram la don kumba 117 ngut ki briew kiba la shah peit bniah (quarantined) ha la ki ing jong namar ki dak jing pang na ka jing pang ‘coronavirus’
U Director jong ka tnat ka koit ka khiah ka sorkar Mizoram u F. Lallianhlira u la ong ba wat la hapoh ka jyll ym pat don ba ioh jing pang ‘coronavirus’, hynrei kum shi bynta ban tehlakam ia ka jing pang ka sorkar ka la peit thuh bha ia 117 ngut ki briew ba don ki dak ki shin na ka jing pang ‘coronavirus’.
U F. Lallianhlira u la ong ruh ba ka sorkar Mizoram ka la plie ruh ia ka ‘call centre’ na ka bynta ban iarap ia ki briew ki ba sngewthuh ba donkam jing iarap na ka jing pang ‘coronavirus’ bad ki briew ki lah ban phone ha ki number, 0389-2323336, 0389-2322336 and 0389-2318336.Ka sorkar Mizoram ka la bthah ruh ia baroh ki sengbhalang, ki jaka pule, ki ing mane ban ialeh katba lah ban nym ia lum bun briew ban lait na ka jing pang ‘coronavirus’.