CORONAVIRUS

Kong Linda Kongwang

CORONAVIRUS: Ki lynti ban sumar ialade hadien ba la koit na ka jingpang Covid-19.

Hadien ka jingshahktah na u khniang jingpang Covid-19, bun ki briew ki bud ryntih iaki kyndon halor ka jinglah ban ai jingiada ialade naka jingshahktah biang ha kane ka khlam coronavirus. Kat haduh mynta ki stadwadbniah ha satlak ka pyrthei kim pat lah satia ban lap iaki dawai kiba lah ban iakhun pyrshah ia kane ka jingpang bad ka jingwadbniah ka dangbteng kat haduh mynta. Halor ka jingioh jingtip kidon ki nongpang kiba la shahktah teng ha une u khniang jingpang hynrei ki ngat biang sa shisien pat ha kane ka jingpang khlam. Kham bun ki briew napdeng kito kiba don jingma ban ngat ha kane ka jingpang khlam kidei kiba la tymmen ka rta lane kito ki bymlah ban shimkhia ban ai jingiada ialade kaba kynthup ka jingiada iaka bormet kalong kaba donkam ban shimkhia hadien bala koit naka jingpang. Ki kyndon kiba biangtam ban iada ialade bad ka jingai jingmut ia baroh ban lait naka jingshahktah biang ha kane ka jingpang kadei ban deng thikna iaki mask, sait iala ki kti manla kapor bad pyrshang ban iajngai iwei na iwei pat, ka jingpynkynmaw halor kumno ban bud ia kine ki kyndon haka jingim ba manla kasngi kaba ymdon jingktah ei ei ruh em.
KINE HARUM KILONG KI KATTO KATNE KI LYNTI KIBA PHI DONKAM BAN LEH HADIEN BALA KOIT NAKA KHLAM COVID-19.

KA JINGDONKAM BAN KILAN MET :— Ka jingkilan met kalah ban kham jynjar hapdeng ba dangshu koit ba kane ka jingpang bad naka jinglong tlot ka met, hynrei kalong kaba donkam ban sdang iaka jingkilan met manla kasngi hadien bala koit nakane ka jingpang naka bynta ka jingkoit jingkhiah jongka bormet bad ka bor jabieng.

KA JINGJIED IAKI JINGBAM BA TEI:– Sa kawei pat ka lynti kaba phi donkam ban pyrshang naka bynta ban iada ialade nakane ka jingpang kalong ban bam ki jingbam ba dap kyrhai daka jingdon ki nutrients kiba tei iaka bormet ki balah ban iarap pynkoit kloi nakane ka jingpang. Kane ka jingpang khlam kadei kaba wanrah ka jingbanbor ka jingmut jingpyrkhat bad ki dawai kiba phi pyndonkam ban dih ha kum kane kapor ka ktahjur halor ka jinglong jingman jongka met jongphi. Kidon katto katne ki nongpang ki pynpaw halor ka jinghiar kynsan ka jingkhia. Namarkata pyrshang ban bam ki jingbam kiba kynsai bad tei iaka met kum ki jhur, ka pylleng, ka doh ban marmot iaka jinghiar ka bormet. Pyrshang ban bam ki jingbam ba la shet ban pynsuk halor ka jinglah ka met ban tylliat jingbam. Kynmaw ba ka met jongphi ka shimpor ban iohbiang ka bor met kaba khlain. Pyrshang ban ym bam katba mon ne ban bam ki jingbam bymtei iaka met.

PYNKHLAIN IAKA BOR KYNMAW:— Une u khniang jingpang udei uba latip ba ulah ban thombor iaki cell kiba iadei bad ka bor kynmaw. Ban kyntiew biang iaka bor kynmaw halor ka jinglah ban pynleit jingmut, kalong kaba donkam ban mang por naka bynta ka bor pyrkhat bad ka bor kynmaw da kaba pyndonkam kum ki jingialehkai puzzles, ki jingialehkai ba iadei bad ka bor kynmaw bad ki jingialehkai da kaba shu thaw kiba phi shem ba kilong kiba eh ban pyrkhat kiba phi donkam ban pyrkhat borbah. Sdang ia kum kine ki jait jingialehkai kibalah ban kyntiew iaka jingproh jabieng. Kalah ban treikam suki suki hynrei kadei kaei kaei kaba lah ban kyntiew 8aka hor jabieng kat nangmih ki sngi kipor.

KA JINGAIPOR IALADE:— Ha kaba sdang phim dei ban khmih lynti ban sdangbiang mardor shaka jinglong jingman kumba phi ju leh manla kasngi tang hadien bala poi ha iing ne bala koit nakane ka jingpang. Hynrei phi dei ban aipor ialade ban wanphai biang sha ka jinglong jingman kumba phi ju leh manla kasngi. Kynmaw,phi dangshu koit nakane ka jingpang kaba ktah iaka bormet jongphi bad kalong kaba donkam ban pynleit jingmut suki suki iaki kam kiba phi ju leh borabor ban kaba leh khlem pyrkhat.

KHMIHTHUH LADA DON KI DAK PAW HAKA MET:— La ka dei ka jingioh baiongkhlieh ne ka jinglong thait ka met, kaling kaba donkam ban KHMIHTHUH halor kino kino ki dak kiba paw kiba ka met jongphi kam pat lah satia ban pynthikna ba phi la lait na une u khniang jingpang. Kalong kaba donkam ban iakynduh tengkhat bad ki nongsumar jongphi lada phi don kino kino ki dak jingshitom ban pynthikna baphi lait nakaba ngat biang ha une u khniang jingpang.

KA JINGWAD JINGIARAP HAPDENG BALA KOIT:— Ban sngewthuh halor ka jingdonkam ban pynjahthait ialade bad ban wallam biang ka jinglong jingman kumba ju long hadien bala ioh ka jingkoit kaba pura, kaba donkam kalong ban wad jingiarap ha kano kano ka por baphi donkam namar kane ka iarap ban aibor kloi iaphi bad ialeh pyrshah iaka jingsngewlong thait ka met. Naduh ka leit iew leit hat, ka shet ka tiew bad kiwei de ka met jongphi ka donkam shibun ki lad ki lynti ban ioh ka jingkoit ba pura. Namarkata da kaba pan jingiarap na kiba haiing hasem ne ki paralok ba iajan ban don bynta hapdeng baphi dang don haka lynti iaid naka bynta ka jinglah ban ioh ka jingkoit, kalah ban ai jingmyntoi shibun iaphi.
Khublei