Congress weng noh ia u Mukul,ong SKRS War Jaintia

Shillong, 7 Risaw:
Ka Synjuk Ki Rangbah shnong Shnong (SKRS) War Jaintia ka la ong ba ka party Congress ba dei ban weng noh ia u Mukul Sangma kum u Myntri Rangbah ka jylla halor ka jingleh bym suidniew jong u.
Ha ka jingpynlait khubor mynta ka sngi, u president ka SKRS u Bah K Pohshna u la ong ba naduh ba la shimti u Mukul Sangma kum u myntri rangbah, la kiew dor lut ki mar ki mata wat ia ka shini reshon ruh ym ju ioh shuh ban sei mynta bad kane ka la buh ia ka jingeh jong ki paidbah.
“Ka War Jaintia ka kyntu ia ka party Congress ban pynsangeh noh ia u Mukul ban long u Myntri Rangbah namar ba naduh ba la shimti ma u, ki paidbah ki la mad shibun ki jingeh”, la ong u Bah Pohshna.
U Bah Pohsna u la ong ba ki paidbah ka War Jaintia ki kyrshan ia ka jingdawa ban pyntreikam noh ia ka Inner Line Permit (ILP) ha kane ka jylla kumba la dawa da ki sengbhalang ha kane ka jylla bad kyntu ba ka sorkar ka dei ban pynurlong noh ia kane ka jingangnud ki paidbah khlem pynslem shuh.
U la ong ruh ba naduh ba shimti u Mukul, wat ha ka tnad pule puthi ruh la sangeh ban thung nonghikai ha ki kam ba lait bad mynta ki la shu sah kumto kaba la wanrah jingeh kylla ia ki khynnah skul ha ki skul primary skul.
“Ngi pyrshah jur ia ka jingleh jong ka sorkar hapoh ka jingialam u Mukul bad ka party Congress ka dei ban thung noh da uwei pat uban kitkhlieh na ka bynta ki paidbah bad ka imlang sahlang”, la ong u Bah Pohshna.