Clean Politic ka HSPDP ha Mawhati

Nongpoh, 20 Jymmang:
Da ka jingthmu ban wanrah ia ka jingkylla ha ka synshar ka khaddar bad ban wanrah ia ka jing synshar kaba khuid ba suba hapoh ka jylla, ka Hills State People Democratic Party (HSPDP) ka la pyntip paidbah ba kan pynlong ia ka (Clean Politic Campaign) ha ka 23 tarik mynta u bnai ha Mawhati.
Kat kum ka kyrwoh ba la pynlait da u Bah Tyngshain L Lapang, Secretary HSPDP Mawhati Area Unit, la ong ba ha katei ka sngi kin wan ki nongialam ba ha khmat ka HSPDP, ba kynthup naduh u president ba rangbah ka HSPDP, u Bah Ardent Miller Basaiaw moit, ryngkat bad kiwei kiwei ki nongialam ba ha khmat jong ka Party, ki ban pynshai paidbah ha kaba iadei bad ka synshar khadar kaba khuid kumjuh ruh ban pynshai ia ka nongrim jong ka Party HSPDP.
Kumta ka HSPDP, Ri Bhoi District, ha ryngkat ka jingiatreilang bad ka HSPDP Mawhati Constituency Area Unit, ka khot ka wer ia ki paidbah ka thain Mawhati bad na kiwei kiwei ki jaka ba kin ia wan ban sha katei ka jingialang paidbah ban iohsngew ia ki jingpynshai halor jong katei ka phang bad ruh ia ka nongrim ba ka HSPDP ka ieng haduh mynta mynne.