‘Christianity’ ka dei ka niam Blei

Bah Francis Syiemlieh

Haba ong ‘Ka Niam’ kamut ka rukom jingim ba manla kasngi (way of life) jong u briew (u jingthaw) da kaba u pynsngewbha îala u Blei (u Nongthaw). Da kane ngi sngewthuh ba, ‘Niam’ kamut ruh ka riti ka dustur ne ka Kolshor jong ka jingîadei hapdeng jong u briew bad u Blei.

Kane kam dei ka kolshor kaba lathaw da u briew ban pynsngewbha îala u para briew hynrei kadei kolshor kaba la îathaw lang da u Blei bad u briew (Covenant) ban pynsngewbha îa u Blei, khnang ba u briew pat ha ka pyrthei un îoh îa ki jingkyrkhu-blei, kum îa ka ‘Divine Providence’bad kiwei kiwei ki jingaiei, kiba u briew u donkam, khnang ba un nym kylla long u mrad lane u mraw jong u ksuidtan, bad ba ka mynsiem jong-u kan nym shah shop shapoh dujok ding akher kasngi.

Lada phin wad îa ka internet phin lap ba kidon shibun bah ki jingsaidnia (arguments) shaphang jong ka niam ban batai îa ka jingmut jongka kamut aîu. Hynrei bun na kitei ki jingsaidnia kim dei kiba mih na ki briew kiba biang ka jingîatiplem (conscience) bad ka jingsngewthuh (understanding). Bun naki kidei ki riewleh menleh khrawpyrkhat (pseudo or wannabe intellectuals) bad kiba kum kine ki briew kidon ha Rikhasi ruh. Bun ruh kidei ki suri kup snieh langbrot, pyrshah tang îa ka Niam Kristan hi marwei (wolves in sheep skin, against Christianity alone).
Îa ka kyntien ‘Christianity’ la krap lang da artylli ki noun, kawei kadei ka Common noun ‘Christian’ kaba thew îa u/ka briew bad kawei pat kadei ka Abstract noun ‘-ity’ban pynpura îaka sha ka kyntien ‘Christianity’ ban mut ka jingleh jingkam jong u/ka briew. Kumta ‘Christianity’ kamut u briew (u Kristan) bad ka jingleh jingkam jong-u ban pynsngewbha îa u Blei.
Mynta shu peit îa kine ki mat ba tang khyndiat harum:

• Da ka niam la kyntiew îa ki jingduwai sha u Blei bad khlem ka niam u Blei um sngap îa ki jingduwai. Ka Niam ka hikai îa u briew ba un tip îala ka akor briew jong-u kumno udei ban leh ban kam îalade hakhmat jong u Blei. U briew uba duwai udei uba u kit ne rah îa ka niam kat shaba u leit.Hynrei wat kito kiba duwai ha u ksuid ruh ki rah îa ka niam mane ksuid jongki kat shaba ki leit.
• Da ka Niam la beh noh îa ki ksuid ki khrei. Hato u Jisu u shu sei da kti ïa ki ksuid na ki briew, ne u sei da ka bor-niam kaba don Ha-u?
• Da ka Niam la pynduhbor îa ki nongleh byrtong. Hato u Simon nonglehbyrtong um shym la pyndem îalade ha ka bor-niam kaba don hapoh jong ki Apostol?
• Da ka Niam la beh noh îa ka Tyrut ka smer, îa ka taro ka shwar, îa u ksuid u thlen bad kumta terter bad khlem ka Niam ymlah ban leh eiei ruh îa kine baroh ki bor jingdum. Ka Niam bad u Trai Jisu kilong kum ka jingkñia/’Langsaitpap bad ka duwan bad ymlah ban pynîakhlad îa kine artylli iwei na iwei pat lano lano ruh.
• Da ka Niam la pynkoit îa ki bapang. Hynrei don pat ba ka niam mane ksuid ne ka niam briew ruh ki pynkoit îa ki briew da ka bor bad da ka buit jongki bad îa kane baroh laleh la kam (carried out, practiced) da ki briew hi.
• Da ka Niam la pynmynta (recall) îa ka jingkñia bakhraw tam jong u Trai Jisu Krist îalade halor ka Diengphna halor u lum Kalbari, namar u Jisu hi u la-ong ha ki Apostol ha ka jingkhawai bakhatduh “To leh îa kane ban kynmaw îanga.” Katbai kynum/kthaw D.H. Kharkongor pat i ong hana ladep namarba la pyndep. Imat i mut ban tih ‘liewlep îano îano, khnang ba kito kiba îaleit sha dujok kin dup îabun îabun shuhshuh!
• Da ka niam la pynlong Kristan îa ki briew bad khlem ka Niam ymlah ban pynlong Kristan îano îano ruh. Ka jingleh Kristan kaba khlem ka Niam kam long kaba pura hynrei kalong kaba tang na sla, kalong thik kum kaba ngi peit îa ka duriaw hapoh desktop ne computer screen.
• Da ka niam la map noh îa ki pop. U Jisu haba u map pop u leh îa kata da ka Niam jong ka Trinity Bakhuid, kata, da ka Kolshor jong ka jingîadei hapdeng jong U Kpa, U Khun bad U Mynsiem Bakhuid.
• Da ka Niam la pynîaidbeit wat îa kito kiba îaidkdor ha ka jingmlien jongkiha ka jingim.
• Da ka Niam la pynîathoh shongkurim îa ki briew.
• Da ka Niam la jer kyrteng bad la pynehrngiew îa ki briew.
• Da ka Niam lateh lane la pyllait ha khyndew îa kaei kaba lateh ne la pyllait ha Bneng.
• Da ka Niam la pynlong îa ki briew ki khun jong u Blei, kaba sah pat ka shong ha ka mon balaitluid jongki.
• Ka Niam kadon îa ka nia ba-im haka, kumta haba labeh noh îa ki bor jingdum da ka Niam ki bor jingdum kim ju nud ban îapyneh badka, namarba ka NIAM BLEI ka îoh îa ka hukum jongka na u Blei hi. U briew uba tip bha îa ka Niam ki ksuid baroh ki bishni haduh katta katta, hynrei ki tieng ruh thotthot îa-u. Laseng ïa ka NIAM KRISTAN da u Blei hi, hato kam dei ka Niam Blei?
• Ka Niam Blei ka lah ban beh noh îa kino kino ruh ki jait bor jingdum baroh, lait noh tang îa ka mon balaitluid jong u briew da kaba u pynmong îa u Blei hi.
  Ka jingpyrshang jong i kynum/kthaw D.H. Kharkongor ban hikai skul îangi kadei tang ka jingsngewthuh bashimet jong-i marwei (personal conjecture/speculation). Hynrei lada i sngewthuh marwei balei pat i thoh ha ka article? Hato kam dei ba i mut ban pynliatlor lang îa kiwei ha ka ‘liewlep jong-i?(Balei nga kam kynum/kthaw îa ki bah D.H. Kharkongor kalong namarba ka ‘better half’ jongnga ruh kadei kaba na ka jait ka khong jong-i). I Bah D.H. Kharkongor i dei ruh ban tip ba ka Niam Kristan kam ju pynîapher ne ñiewbeiñ îano îano. Ka daw tynrai jong ka jingsngew îapher niam bad îapher balang jong ki briew ka wan na ka saiñpyrkhat niam POK-POK (Protestant Ong Kristan-Pyrthuh Ong Kumjuh) jong u Martin Luther bad kiwei kiwei hi. Kane ka paw ba dei ka niam Protestant kaba long ka daw jong ka jingîashut bad ka jingîashun baroh jong ki briew ha ka pyrthei bad ha kane ka Rikhasi jongngi ruh kumjuh. Kumta lada ka niam Protestant kam duh noh na ka pyrthei, ka pyrthei kan sa dang sniew dang sniew shuhshuh katba ki dang mih ki snem bad ki por.
  Balei i kynum/kthaw D.H. Kharkongor im thoh beit tang da ka Khasi? Balei i thoh lang phareng bad khasi îa ka kyrteng jong ka article jong-i? Balei i kyntait ne tieng ban thoh beit ‘KA NIAM KRISTAN KAM DEI KA NIAM’? Hato im dei u suri kup snieh langbrot ba pun buit shipoh?Hato i mut ban ong ba ka dang lah ka jingîadih îabam lang jong ki mendih bad ka jingîabamsap bampap lang jong ki riewbamsap bampap, bad ka jingîakyrsum lang jong ki riewawria kiba îapher ha ka niam/balang ban îa ka jingleh jingkam jong ka Niam Kristan? Lada i mut kumne, te îabishar hi maphi ki nongpule i Bah D.H. Kharkongor i mut ban ñiah ne ban pynnoh shaei îa ka Niam Kristan bad îa ka jingsngewthuh jong ki briew (Ki Kristan) shaphang jong ka Niam Kristan; hynrei in nym lah ban thaw pyrthei eiei ruh em!!!
  Khatduh, nga kubur hangne ban ong ba ka jingong jong i Bah D.H. Kharkongor (ymdei ha u Rupang) ba “Christianity kam dei ka niam” kadei kaba bakla (erroneous) bad kaba don jingthmu basniew (malicious intention)!